№ 9 р., лютого 4, Варшава. - Грамота Сиґізмунда Августа зем’янам за- уським з Київського воєводства на різні права і вольності шляхетські
Жикгимонтъ Августъ, Божъею милостью король Польскій, великій князь Литовскій, Рускій, Прускій, Мазовецкій, Жомоитскій, Кіевскій, Волынскій, Под- ляскій, Ифлянтскій. Чинимъ знаменито тымъ нашимъ привилеемъ, нинѣшнимъ и напотомъ будучимъ.
Пріѣздили до насъ земяне наши земли Кіевское Заушскіе, съ Ходаковъ, шляхетные: Василей Меленевичъ Тупоголовскій, Богданъ Есковичъ Каленскій, Василей Малковичъ Ходаковскій, Иванъ Юрьевичъ Багриновскій, Василей Климовичъ а Григорей Стефановичъ Бѣлошицкіе, съ братьею своею земя- ны Кіевскими зъ Заушъя, бьючи намъ чоломъ о томъ: ижъ яко зъ давныхъ часовъ, за славное а светое памети продковъ нашихъ, королей Польскихъ и великихь князей Литовскихъ, всякихъ правъ, свободъ и вольностей шляхетскихъ уживали и службу нашу земскую военную, за потребою припалою, заровно зъ иншими земяны Кіевскими намъ, господару, и Речи Посполитой служивали, и покладали передъ нами листы наши, съ канцляреи нашое великого князства Литовского до воеводы Кіевского и такожъ и до кашталяна Кіевского писаные, росказуючи, абы ни въ чомъ не нарушиваючи стародавныхъ правъ, вольностей и свободъ шляхетскихъ, ни до якихь инихь повинностей и послугь замковыхъ имъ незвыклыхъ, такъ тежъ и ку послушенству и присуду замковому не притягали, и мѣшканьемъ уставичнымъ при собѣ въ Кіевѣ, кгды якое потребы и послуги нашое военное не вказываетъ, трудности имъ не чинили, але кебы ся во всемъ ку нимъ спокойнѣ и пристойнѣ, яко противъ шляхтѣ належи, заховали, абыхмо въ томъ ласку нашу королевскую имъ показали, а при таковыхъ всихъ правахъ, свободахъ и вольностяхъ шляхетскихъ, которыхь они здавна заровно зъ иншою шляхтою земли Кіевское уживали, ихъ зоставивши и заховавши, листомъ привплеемъ нашимъ имъ то утвердити велѣли, за которымъ бы они сами и потомкове ихъ, водлугъ стародавнего обычаю уживаючи волности, свободъ и правь шляхетскихъ поспо- литыхъ, въ покою мѣшкати могли. Мы, взявши о томъ певную ведомость, ижъ они зъ давныхъ часовъ правъ, свободъ и вольности шляхетскихъ уживаючи за- ровно зъ иною шляхтою земяны Кіевскими, кгды того потреба указывала, службу нашу земскую военную намъ, господару, и Речи Посполитой служивали; звлаща, ижъ за теперешнимъ доистьемъ Уній, албо зъедноченьемъ Короны з Великимъ князствомъ Литовским, и за приверненьемъ до короны земли Кіевское, всихъ пановъ-радъ, земянъ, шляхту и обывателовъ земли Кіевское при всякихъ правахъ, свободахъ и волностяхъ ихъ шляхетскихъ, которыхъ они здавна звыкли уживати, зоставивши и заховавши, а особливѣ вольностями в свободами коронными обда- ровавшы, особливымъ привильемъ нашимъ то все земли Кіевской утвердили; и для преслуханья присеги земянъ и всихъ обывателовъ земли Кіевское ку корунѣ посылали есьмо дворанина нашого урожоного Яна Быстриковскаго, который намъ далъ справу, ижъ и тые земяне наши вышемененые заровно зъ иными земяны и обывателми земли Кіевское, водлугъ повинности своее, присегу ку коронѣ учинили и въ реестръ межи иными земяны и обывателми земли Кіевское заровно суть описаны и передъ насъ, господара, принесены, - на чоломбитье ихъ, яко вѣрныхъ подданныхъ нашихъ, учинили, а ихъ при всякихъ правахъ, свободахъ и вольностяхъ шляхетскахъ, водлугъ стародавнего обычая, зоставили и заховали, яко жъ и тымъ привилеемъ нашимъ заховывамы, зоставуемы и утвержамы вше- лякіе права и вольности ихъ шляхетскіе потому, яко того зъ давныхъ часовъ за славное а светое намети продковъ нашихъ, королей Польскихъ и великихъ князей Литовскихъ, звыкли уживати; которыхъ всихъ вольностей своихъ шляхетскихъ маютъ они сами, жоны, дѣти, потомкове и щадки ихъ обоего поколѣнья уживати и въ нихъ ся ховать, множити и веселити вѣчными часы, служачи намъ, господару, и Речи Посполитой службу нашу земскую, военную, заровно зъ иными земяны и обывателми земли Кіевское, водлугъ потребы припалое военное, албо рушенья посполитого; а иныхъ никоторыхъ повинностей и послугъ замковыхъ, которые на бояръ путныхъ належатъ, и тежъ уставичного мішканья при замку нашомъ Шевскомъ, кгды того потреба военная не припадеть, полнити и чинити не повин- ни; въ чомъ воеводове в кашталянове Кіевскіе теперешніе и напотомъ будучіе, такъ за щастливого панованья нашого, яко и потомковъ нашихъ, королей Польскихъ и великихъ князей Литовскихъ, ніякое трудности и утисненья надъ право по сполитое и надъ тотъ привилей нашъ, отъ насъ имъ даный, ніякимь обычаемъ чинити не мають и не будуть мочи. И на то есьмо имъ дали тот нашъ привилей и съ подписаньемъ руки нашое королевское, до которого и печать нашу коронную привѣсити есьмо росказали.Данъ въ Варшавѣ, дня четвертого Февраля, року Божъего Нароженья тисеча пять сотъ семдесятого, а панованья нашого чтырдестого першого. - Реляцыя вел- можного Валентого Дебинского, зъ Дебянъ, канцлера коронного.
Акты ЮЗР. - СПб., 1863. - Т. 1. - С. 169-170.
Еще по теме № 9 р., лютого 4, Варшава. - Грамота Сиґізмунда Августа зем’янам за- уським з Київського воєводства на різні права і вольності шляхетські:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -