№ 10 1572 р., травня 30, Варшава. - Підтвердна грамота Сиґізмунда Августа королівському дворянинові Філіпу Водичці на сс. Ставок і Невжин, подаровані йому луцьким та острозьким єпископом Іоною
Жикгимонтъ Августъ, Божъею милостью король Полскій, великій князь Литовскій, Рускій, Прускій, Жомоитскій, Мазовецкій и иныхъ. Ознаймуемы тымъ листомъ нашимъ всимъ вобецъ и кождому зособна, кому того вѣдати належи.
Постановившее обличнѣ передъ нами, господаремъ, въ Варшавѣ, велебный Іона Борзобогатый Красевскій, владыка Луцкій и Острозскій, архимандритъ Жиди- чинскій, самъ особою своею явнѣ и добровольна созналъ: ижъ знаючи ку собѣ учтивое захованье шляхетного Филипа Водички, дворанина нашого, зятя своего, который дей презъ немалый часъ ку нему и ку вшелякимъ потребамъ и справамъ его оказовалъ, далъ и записалъ ему двѣ селѣ: одно владыцства Луцкого, а другое архимандритства Жидичииского, лежачіе въ повѣтѣ Луцкомъ, то ѣсть село Ставокъ, ку владыцству Луцкому прислухаючее, а село Невжинъ, ку архимандритству Жидичинскому прислухаючее, зо всимъ навсе, яко зъ людми оселыми, и зъ ихъ всякими належностями и пожитки, яко се въ собѣ и въ пожиткохъ своихъ здавна мають, до его живота; на што жъ и листъ, записъ свой, ему подъ печатью своею и съ подписомъ руки своее далъ, въ которомъ то все ширей а достаточней описано естъ; яко жъ тотъ записъ свой владыка Луцкій передъ нами покладалъ, просечи насъ за то, абыхмо для вшелякого безпеченства и на пришлые часы тую речъ умоцнивши, водлугъ права, до книгъ нашихъ канцлярейскихъ коронныхъ вписати веліли. А такъ мы того доброволного сознанья владыки Луцкого выслухавши и листу записного огледавши, а за слушный принявши, и то все ку ведомости нашой припустивши, росказали есьмо слово отъ слова до книгъ нашихъ канцлерейскихъ коронныхъ вписати, который такъ ся въ собѣ маеть. Я, Іона Борзобогатый, Кра- сеньскій, владыка Луцкій и Острозскій, архимандритъ Жидичинскій, ознаймую симъ моимъ листомъ, кому будеть того потреба вѣдати: ижъ я знаючи ку собѣ учтивое захованье зятя моего, дворанина его кролевское милости пана Филипа Водички, которое онъ презъ немалый часъ ку мнѣ и ку вшелякимъ потребамъ и справамъ моимъ оказовалъ, и хотечи его и напродъ ку собѣ и справамъ моимъ охотиѣишимъ учинити, даю, дарую и симъ листомъ моимъ записую двѣ селѣ: одно владыцства Луцкого, а другое архимандритства Жидичинского, въ повѣтѣ Луцкомъ лежачіе, то естъ село Ставокъ, ку владыцству Луцкому прислухаючее, а село Невжинъ, ку архимандритству Жидичинскому прислухаючее, зо всимъ на все, яко зъ людми оселыми и зъ ихъ всякими належностями и пожитки, такъ, яко ся тые двѣ селѣ здавна сами въ собѣ и въ пожиткохъ своихъ мають, до его живота, которые села, то естъ село Невжинъ, скоро пріѣхавши мнѣ отсель зъ Варшавы на Волынь, маю и буду повиненъ пану Филипу Водичкѣ, зятю своему, поступити и въ держанье ему зо всимъ подати; а другое село Ставокъ, которое на тотъ часъ панъ Александро Семашко взявши безправнѣ держить, скоро отыскавши и взявши зъ держанья пана Семашкова, ему поступити и въ держанье подати маю и буду повиненъ; которые села вышейпомененые зять мой панъ Филипъ Водичка маеть держати и всякихъ пожитковъ, съ тыхъ дву селъ приходячихъ, уживати до живота своего, а я самъ, а ни потомкове мои, которые бы по смерти моей, зъ ласки его кролевское милости, тое владыцство Луцкое и архимандритство Жидичинс- кое держали, въ томъ ему жадное трудности и переказы чинити и тыхъ селъ зъ держанья его брати и выймовати не мають, и не будуть мочи, ажъ до его живота; якожемъ я, будучи теперъ въ Варшавѣ, то все водлугъ сего листу моего, ставши обличнѣ передъ его кролевскою милостью, созналъ и то ознаймилъ, и на то есми далъ зятю моему пану Филипу Водичці сесь мой листъ зъ моею печатью и съ под- писомъ руки моее властное. Писанъ въ Варшавѣ, року Божъего Нароженья тисеча пять сотъ семдесятъ второго, мѣсяца мая тридцатого дня. Ино, кгдыжь владыка Луцкій, знаючи учтивое захованье ку дворанина нашого Филипа Водички, поме- неные двѣ селѣ ему далъ, листомъ и записомъ своимъ до живота его записалъ, и то добровольна, водлугъ обычаю права заховуючисе, передъ нами господаремъ, яко на вряд зверхнемъ, вызвалъ: про то мы, яко тое добровольное сознанье и слушнѣ на то учиневый записъ ни въ чомъ намнѣй не нарушиваючи, але вцалѣ заховуючи, при моцы зоставуемъ, а моцъю зверхности нашое господарское потвержаемъ и умоцняемъ тымъ пашимъ листомъ; маеть Филипъ Водичка, дворанинъ нашь, вод- лугъ запису владыки Луцкого и того нашого потверженья, тые две селѣ вышей- помененые держати, и всякихъ пожитковъ и доходовъ съ нихъ уживати до живота своего, а владыка теперешній Луцкій, архимандригьЖидичинскій, и потомки его по немъ будучіе, хто бы кольвекъ зъ ласки нашое тое владыцство Луцкое и архимандритство Жидичинское держалъ, въ томъ ему жадное трудности и переказы чинить, и зъ держанья и уживанья его тыхъ двохъ селъ помененыхъ брати и вый- мовати не мають, и не будуть мочи, ажъ до живота своего, але во всемъ ся ку нему заховати, водлугъ листу запису владыки Луцкого и архимандрита Жидичинского, и водлугъ того нашого потверженья, до которого есьмо на твердость того всего вышейписаного и печать вашу коронную притиснути велѣли.Данъ въ Варшавѣ, дня тридцатого мѣсяца мая, року отъ Нароженья Сына Божого тисеча пять сотъ семдесятъ второго, а панованья нашого року сорокъ тре- тего.
Акты ЮЗР. - СПб., 1863. - Т. 1. - С. 188-190.
Еще по теме № 10 1572 р., травня 30, Варшава. - Підтвердна грамота Сиґізмунда Августа королівському дворянинові Філіпу Водичці на сс. Ставок і Невжин, подаровані йому луцьким та острозьким єпископом Іоною:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -