№ 37 р., червня 27 - липня 21, Люблін. - Інструкції польського короля Сиґізмунда Августа Василеві Древинському і Лавринові Войні про те, що вони повинні представити на обговорення литовським панам-раді, які з’їхалися в Бересті на сейм

I. Року 1566 мѣсяца іюня 27 дня. Ачъ колвекъ невонтпи его кролевская ми­лость, же ваша милость панове рада славного панства великого князства зъ вѣры присеги и повинности своее, которую на собѣ носите, завжды о доброе Речи Посполитое того паньства великого князства Литовского зъ наболшимъ усилова- ньемъ радити и обмышлевати звыкли есте, намнѣйшое речи не упущаючи, што потребно быти розумієте, и въ томъ теперешнемъ зьіханю своемъ того всего, до чого ся ваша милость собрали, отправовати не занехаете; відже съ часток- ротныхъ слуховъ, такъ отъ его милости пана гетмана, яко и отъ всихъ становъ украинныхъ писанья, бачечи, жеся зъ стороны непріятельское праві ничого ку безпечносте не хилить; а кгды ся еще послы, не постановивши ничого, вернуть, то ся само окажеть, же тотъ непріятель, такъ яко и первей, тутъ же за ними при­быти не занехаеть, абы злому умыслу досыть учинилъ, чого ему Боже не помози; тогды его кролевская милость нездрожно быти розуміти рачить вашу милость пановъ радъ своихъ напомянути, же бы ваша милость звлаща подъ теперешнимъ зьіханьемъ своимъ Берестя, подлі звыклое віры своее, радили, намовляли, ижъ бы вси речи потребы земскіе, на тотъ съемъ знесеные, спішні ся отправовали и ку скутку приводили, абы за омішкиваньемъ справъ соймовыхъ и то, што естъ непосліднійшого, незанехивалося, але што може быть наиборздей вынайдо- вано, яко бы ся тому за часу забічи могло, же бы непріятель потіхи не взялъ.

Къ тому ижъ за листы его кролевское милости первшими о войну, до всихъ становъ писаными и вжо отъ немалого часу розослаными, ліниво ся на войну выправують: про то ваша милость рачте межи собою такій обычай найдовати, яко бы тые лінивые тымъ спішней до повинности своее побужени были, а службы земское звлаща подъ такъ небезпечнымъ часомъ не омішкивали.

О небезпечностяхъ земли Ифлянтское, такъ отъ Швета, яко и отъ Москов­ского, кгдыжъ за первшимъ ку собі, писаньемъ его кролевскои милости ваша милость відомость маете: тогды обмышлевати вашой милости потреба, яко бы ся имъ въ часъ забічи могло, а звлаща подь симъ часомъ, кгды его милость княжа Пруское тисечу коней іздныхь люду Німецкого, ку потребі его кролевскои ми­лости, до земли Лифлянтское на цілую полрока накладомъ своимъ выправилъ, же бы тые люди, такъ тежъ и служебные его кролевской милости, тамъ дармо часу не тратечи, послугу якую учинити могли; а звлаща и его милость панъ ста­роста Жомоитскій, яко рада его кролевское милости, который зъ намовы вашое милости тамъ до тое земли для потребного и пожиточного Речи Посполитой того паньства великого князства Литовского тягнути маеть, жебы для предлуженья сойму тамъ тое потребы неомішкалъ, кгдыжъ тые люди ничего безъ его милости тамъ починяти не могуть, а въ омішканью того, якобы ся шкода скарбу або, чого Боже уховай, и болілого што не стало: то ваша милость лацно обачити можете. А которою бы дорогою тые люди княжати Пруского до Лифлянть тягнути міли: абы ваша милость о томъ, кромъ всякого омѣшканья, зданье свое его кролевскои милости ознаймили.

Немнѣй тежъ его кролевская милость рачитъ видѣти потребу обмышлевати вашой милости, отколь бы ся людемъ служебнымъ въ земли Лифлянтской старая заплата стала и на ново потомъ доходила, же бы ся часу потребы въ службахъ его кролевское милости ни чимъ не вымовляли, а меновите о люди служебные Нѣмецкіе, которые служать на Пернавѣ, иже для незаплаты великій недостатокь пріймують, и для такого недостатку а надзы своее далѣй трвати не могуть, же бы потомъ зъ недостатку яко не свои, але чужоземцы чого ся иншого не домыслили.

Про то его кролевская милость напоминати вашу милость рачить, абы ваша милость въ томъ теперешнемъ зъѣханью и собранью своемъ, подлѣ звыклости своее, вси тые речи, для которыхъ ваша милость на съемъ заѣхали и въ кото­рыхъ черезъ его милость пана подканцлерого отъ его кролевской милости ку собѣ всказанье мѣли, у собѣ уважаючи, радили u намавяли, яко бы ся дѣла зем­скіе, што наборздей быти можетъ зъ добрымъ и пожиточнымъ и славнымъ его кролевскои милости и Речи Посполитое того панства отправовати могли; кгды- жъ его кролевская милость и въ тыхъ справахъ, въ которыхъ быль черезъ пана подканцлерего, ку вашой милости всказати рачилъ черезъ такъ долгій часъ еще жадное ведомости не маеть, яко ваша милость тые потребы земскіе, а правѣ яко кгвалтовные отправили. Писанъ вь Люблинѣ, Sigismundus Augustus гех. - Лав- ринъ Война, писаръ.

У заголовку зазначено: Наука господара короля его милости, даная писару и секретару его кролевской милости, пану Базиліусу Древинскому, донести и оповѣдати ихъ милости паномъ радамъ великого князства Литовскаго, духовнымъ и свѣтским, которые ся на съѣмъ до Берестья зъѣхали, о потребахъ нижей описаныхъ.

II. Року 1566, мѣсяца іюля 21 дня. Яко ваша милость, милостивые панове рада, ку его кролевской милости и до пановъ радъ корунныхъ съ посродку себе ихъ милость пановъ радъ, пана воеводу Менского, пана кашталяна Берестейского и пана подскарбего земского на съѣмъ Любелскій присылати рачили, также и отъ пословъ земль и повѣтовъ великого князства Литовского до пословъ корунныхъ черезъ пословъ особливыхъ всказанье было: тогды якъ первей его кролевская ми­лость около того, съ чимъ ваша милость ихъ милость пановъ пословъ на съемъ здѣшній Любельскій слати мѣли, жадное ведомости отъ вашей милости мѣти не рачилъ; такъ и за пріѣханьемъ ихъ милости, кгдыжъ ку его кролевское милости жадного особливого всказанья ихъ милость не мѣли, трудно его кролевской ми­лости было въ речахъ и потребахъ около злученья тыхъ обудву панствъ коруны Польское и великого князства Литовского належачихъ, межи послы вашей милос­ти и ставы корунными ку зношенью намовъ зносити; бо яко панове послове, отъ вашей милости посланые, жадное зуполное моды и для вступку въ речь надъ инс- трукцыю черезъ ихъ милость посланую до сполныхъ намовъ порученья не мѣли, такъ ся тежъ подобно въ тыхъ речахъ сполнѣ зносити; и яко бы тая фалебная, а здавна для доброго пожиточного и славного земского и Речи Посполитой обоего папства пилнѣ потребная справа ку скуткови сполного зезволенья вашей милости обудвухъ народовъ приведена быти мѣла, намовлятися не могли.

А ижъ тежъ въ томъ таковомъ около вступку въ речь зношенью ничого отъ вашей милости черезъ паны послы до господара доложоно не было, тогды ся его кролевской милости въ то вдавати не годило.

А вѣдь же, яко звыклъ его кролевская милость не только въ такъ великихъ а важныхъ речахъ, але и во всякихъ потребахъ Речи Посполитое и земскихъ при слушномъ зданью и радахъ вашей милости прихиляючися, о всемъ добромъ и пожиточномъ земскомъ обмышлевати часто того не рачитъ опущати, ижъ не одно отъ тыхъ пановъ радь своихъ, которые зъ вашей милостью при боку его кролевс­кое милости съ часомъ потребы бы пати рачите, але и отъ тыхъ, кого бы подъ ко­торымъ часомъ при его кролевской милости не было, зданья ихъ милость потре­буючи, ку ихъ милостямъ посылати и писати занехивати не рачить.

Але ижь за такимъ посельствомъ, отъ вашое милости до пановъ радъ и их милости и всихъ становь корунныхъ донесенымъ, ку жадному вступку въ речь зносити зъ обу сторонъ не могли, а тамъ въ Люблинѣ якое вѣдомости отъ вашое милости ожидаючи и часъ немалый мешкаючи стѣскнили, тогды причитаючи про- довженью часу и непослушной въ справахъ зачатыхъ отправѣ вже ся розъѣхати хотѣли; одножъ его кролевская милость, зъ звыклое доброти и милости своее господарьское забѣгаючи тому, абы по такъ частыхъ зъѣздѣхъ и подь тыми часы правѣ; съ поруганьемъ отъ посторонныхъ такъ важные справы въ розорванье не приходили и якого мниманья около сполное межи обоимъ народомъ милости съ себе не вчинили, рачилъ есть еще правѣ тотъ съемъ Любельскій на собѣ позадер- жати, съ которого сойму, съ чимъ послы вашей милости отправлены, о томъ отъ ихъ милости самыхъ ваша милость вѣдомость взяти рачите; а ижъ съ стороны пановъ радъ и всихъ становъ корунныхъ тую справу, около Уній зачатую, ку слуш­ному звязкови а ровной и однаковой милости братской а вѣчной и несмертель­ной славѣ обоее Речи Посполитое приводити суть жадливи, тогды еще для тыхъ ширшихъ намовъ ку вашей милости послали зъ лавицы радъ корунныхъ: бискупа Премыского, князя Валентына Гербурта, воеводу Краковского, старосту Ратын- ского, пана Станислава Мышковского, а кашталяна Иновлотцлавскаго, старосту Кгостынинского, пана Адама Древицкого и секретари его кролевское милости пана Яна Лешневского, съ которыхъ ваша милость то, съ чимъ ку вашей милости и всимъ станомъ сойму належачимъ посланы, вырозумѣете.

Вшако жъ его кролевская милость, чинечи досыть повинности своей, яко о всемъ добромъ и пожиточномъ того панства, великого кназства Литовского, за- вжды милостивѣ омышливати звыклъ, и теперь о тыхъ панѣхь ихъ милости съ сойму корунного на съемъ Берестѣйскій посланыхъ, вашей милости черезъ мене ведомость даючи нетолко упоминати, але и жедати рачитъ, абы ваша милость па­нове рада того панства всякіе не съ часомъ идучіе, але на вѣки потребные справы и потребы обачаючи и добрѣ уважаючи, по такъ долгомъ часѣ зъѣханья своего вже ся ку слушному а потребному въ милости братской звязкови и сконченью, такъ фалебное а вѣчнѣ пожиточное справы припыхати рачили. А ижъ намовамъ тымъ справъ, такъ небытность его кролевской милости, яко и розная бытность вашей милости съ паны и послы корунными, за немалую заваду и здовженье часу розумѣтися мусить: тогды его кролевская милость сполный а зобополный зъѣздъ вашей милости пановѣ, радъ корунныхъ и великого князства Литовского, также и всихъ становъ зъ обу сторонъ сойму належачихъ, велико потребный быти розумѣючи, радъ бы то видялъ, ижъ бы ваша милость, для доброго земского и Речи Посполитой, въ томъ труженья и праць своихъ не литуючи, а здѣ до Люб­лина, гдѣ самъ его кролевская милость парсоною маестату своего господарского мѣшкати рачить, зъѣхатися рачили, и справы Уній належачіе въ сполной згодѣ и братской милости зъ обу сторонъ речи потребные зносячи и уважаючи, тымъ пильнѣй, пружѣй и статечнѣй отправовати могли: бо то его кролевская милость добрѣ бачити рачитъ, ижъ съ стороны пановъ Поляковъ ни на што милости брат­ской противного, а (чого Боже уховай) вольностямъ и свободамъ вашей милос­ти образливого вытягати не будутъ, одно ровного братерства, для вѣчныхъ а потуженѣйшихъ потребъ обоего панства земскихъ и Речи Посполитое, въ спол- ности вживати жедають. А яко передъ тымъ ваша милость, всякую поспѣшность въ потребахъ Речи Посполитое съ себе оказуючи, ку зъѣздомъ и посыланью тыхъ справъ не были лѣниви, такъ и теперь его кролевская милость того по вашей ми­лости певенъ есть, ижъ ваша милость до Люблина ку намовамъ сполнымъ тыхъ справъ зъѣхатися вборздѣ занедбати не рачите.

Особливе тежъ его кролевская милость, ведле звыклое милости и повинности своее господарское, обмышлеваючи о потребахъ того панства, великого квязства Литовского, якъ первой сего неоднокроть ку вашей милости писати и черезъ пи- сара его кролевское милости пана Древинского всказовати рачилъ, такъ и теперь то передъ вашей милостью переложити и припоменути росказати рачилъ, ижъ за тымъ зъѣханьемъ вашей милости на сьемъ теперешній естъ великая а пильная потреба, ижъ бы ваша милость о такъ великихъ а правѣ налеглыхъ потребахь и долеглостяхъ того панства радити u обычаи тому вынайдовати рачили, откуль бы поратованье потребамь земскимъ и будованье замковъ Лепля, Диены, также поправа и опатренье замковъ пограничныхъ и оборона земли Ифлянтской быти могла; кгдыжъ его кролевская милость въ томъ вашей милости знати давати ра- чилъ, такъ и самымъ вашей милости то не естъ тайно, ижъ скарбъ его кролевское милости вже далей тыхъ потребъ поносити и досыть имъ чинити не можеть; о чомъ, яко его кролевской милости панъ подскарбей ведомость далъ, такъ и ваша милость его милости то подобно вѣдати рачите, што ся въ немъ дѣеть; а естлибы ся откуль поратованья надѣвати могло, то ся само зачнѣ оказуеть, въ якъ великихъ сумахъ имѣнья его кролевской милости въ розные руки заведено и заставлено, такъ, ижъ не только абы еще тымъ потребамъ земскимъ скарбу его кролевской милости досыть ся чинити могло, але и выхованье слушное столу его милости господарьскому, за пріѣханьемъ до того панства, съ трудна быти можеть.

То тежъ его кролевская милость бачному уваженью вашей милости пановъ радъ своихъ припускати рачить, якого вставичного зъ набѣганьемъ нареканья его кролевской милости и вашей милости панове рада отъ людей служебныхъ о за­плату заслуженого старого вживаете; а якъ великая сума имъ естъ винна, то ся зъ личбы бирчихъ земскихъ при соймѣ прошломъ у Вильни оказало, а вже потомъ третюю чверть служать, а никоторое заплаты не мають, откуль бы имъ заплата мѣла дойти пильного обмышлеванья естъ потреба; кгды жъ его кролевская ми­лость того певенъ быти рачить, ижъ ваша милость братьи своей, которые для милости Речи Посполитое на тыхъ службахъ не по малу ся завели шкоды, а его кролевской милости и собѣ съ фрасункомъ набѣганья зычити не будете.

Не мнѣй тежъ такъ у его кролевской милости, яко и у вашей милости пановъ радъ уважано быти мусить, съ чимъ и яко поспѣшно его милости пана старосту Жомоитского до земли Ифлянтской отправовати потреба, бо ижъ его милость, яко рада его кролевское милости, зъ намовы вашей милости тамъ до тое земли, для потребного и пожиточного Речи Посполитой того панства, великого князства Литовского, тягнути маеть, жебы для продовженья часу и недостатку на заплату служебнымъ тамъ тое потребы не омѣшкалъ; кгды жъ людъ служебный отъ кня- жати Пруского ку потребѣ господарьской зведеный. о которомъ его кролевская милость первей вашей милости ознаймити рачилъ. и который вже въ тыхъ часѣхъ въ земли Ифлянтской быти маеть. ничого безъ его милости тамъ почати не мо- гуть; а служебные его милости и иншіе ротмистрове. которые тамъ въ Ифлянтѣхь суть. не маючи певное заплаты заслужоного старого. также и теперъ на службу новую трудно тамъ вытрьвати и служити мають. за чимъ абы ся непотребная шко­да. а чого Боже уховай. и што болшого не стало. То ваша милость лацно обачити можете.

Для которыхъ всихъ вышей помененыхъ потребъ а кгвалтовныхъ налогъ земскихъ при иншомъ обмышлеванью вашей милости и то его кролевская ми­лость припоменути росказати рачилъ. ижъ бы не мешкая помочь и ратунокъ зъ речей готовыхъ. а съ сойму уфаленыхъ. быти могъ. то есть съ серебщизны за два годы прошлые по уфалѣ соймовой вже съ совитостью не выдано естъ; также отъ тыхъ. которые службы земское военное омѣшкивали и которыхь ваша милость. милостивый пане воеводо Виленскій. яко гетманъ великій на онъ часъ будучій. на реистрахъ своихъ на томъ соймѣ Берестейскомъ оказати мѣлъ и къ тому зъ невы­данья податку поголовного. которого бы отправа также водлѣ уфалы соймовое за неотданьемъ съ совитостью быти мѣла; бо гдѣ бы таковые речи. съ сойму уфале- ные. ку до сконалостямъ своимъ приложены не были. тогды бы завжды лѣнивый улегалъ. а послушній и поспѣшный болшіе беремена носити мусялъ.

Здалося тежъ то его кролевской милости запотребно вашей милости ознай­мити. ижъ гамьять цара Перекопского Дербишъ Магметъ мурза писалъ до его кролевской милости о невставичномъ а подступномъ умыслѣ цара Перекопского. для чого ся и оттоль не вельми потреба обезпечати. што ваша милость зъ листу его королевское милости писаного вырозумѣти рачите. Писанъ въ Люблинѣ. - Sigismundus Augustus rex.

У заголовку зазначено: Наука господара короля его милости. даная писару его королевское милости. державцы Квасовскому и Красницкому. пану Лаври- ну Войнѣ. донести и оповѣдѣти ихъ милости паномъ радамъ великого князства Литовского. духовнымъ и свѣтскимь. которые ся на съемъ до Берестья зъѣхали. о потребахъ нижей описаныхъ. На звороті: Instrukcyia krolewska do Brzescia na syem. anno 1566. dana panu Woynie. pisarzowi swemu. z podpisem reki.

Акты ЮЗР. - СПб., 1863. - Т. 1. - С. 157-162.