№ 67 1625 р., лютого 26, Варшава. - Привілей Сиґізмунда ІІІ місту Гоголів на маґдебурґію
Prawo Magdeburske Miastu Hoholewiu dziedicznemu w Kiowczyzne.
Право Майдебурское в местечку Гоголеве в земъли Киевской.
Жикмонт третий, Божию милостю король Польский etc. Ознаймуемо тымъ листомъ нашимъ всимъ посполите и каждому зособна, кому то ведати належит, нинешнимъ и напотомъ будучимъ.
Дал намъ справу уроженый Стефань Неми- ричъ подкоморий Киевский, староста нашъ Овруцький, же умыслиль местечьку своему дедичъному, Гоголеву названому, въ воеводстве Киевъскомъ лежачому, право Майдебурское надати, и теж яръмарокъ и торги тыдневые заповити; и просил насъ, абысмо ему того позволили. А такъ мы, король, бачечи въ том прозьбу его быти слушную, з ласки нашое тымъ листом нашимъ в томъ местечъку его Гоголове мещаномъ гоголевскимъ, подданымъ его, которые тамъ суть, и тым што тамъ осядать будут, право Майдебурское, вольность ме стскую надаемъ, што через войта, бурмистровъ, радецъ и иншихъ урядниковъ местскихъ от преречоного урожоного Степана Немирича, подкоморого Киевъского, и потомковъ его уставле- ныхъ и поданыхъ, во всем порядне справовано и держано быти мает; и вже оттоль местчанове гоголевские права Майдебурского во всих члонках и артикулах его уживати и водле него в речах великих и малых завжды се радити и судити будуть сами межь собою и з гостьми, людми прииждчими, такъ в ярмарокъ и торги, яко и кождым часомъ перед урядом местскимъ. А мы в томъ моцъ и въладзу зупол- ную войтомъ, бурмистромъ, раде и всему вряду местскому Гоголевскому даємо и во всих справах судовых и в речахъ кривавых, што ведлугъ бегу права Майде- бурского им належит, судити и въсказовати и въ инныхъ водле артыкуловъ того права карати; также апелляцией правное до пана своего зверхнего, урожоного Степана Немирича, подкоморого Киевского и потомковъ его не боронити, во всем том прикладомъ; якося околи того порядокъ, водле помененого права Майдебур- ского, в местах головных Кракове, Лвове и индей заховует, к тому допусчаемо в месте Гоголеве ратушъ збудовати, крамы, вагу, постригальню, ятки всякие, лазню посполитую; и што кольвекъ до порядковъ и обходовъ, и пожиткови местскому належаних мети; и ремесла цеховые порядкомъ иншихъ таковых месть споря- дивъши, во всем справовати. Также мети дозволили есмо, и тымъ листомъ нашимъ дозволяемо урожоному Стефанови Немиричову, подкоморому Киевскому, званом месте его Гоголеве уставити ярмарокъ в каждый годъ одинъ, на Светого Петра, свято руское; а торгь кождого тыдня въ второкъ, даючи вольность в том месте гандли купецства всякие вести, корчъми вольные держати, питьемъ шинковати и речами всякими торговати; до которого то места Гоголева, подлугъ звычаю вольности посполитое, на ярмарокъ къ торгу купцомъ и всим людем, обывателем панствъ наших и чужоземцомъ, вольно с товарами всякими и приеждчати, торговати, продовати и куповати и всякими речами гонъдлевати, платечи урожоному подкоморому Киевскому и потомкамъ его што повинность несет мыто торговое по обычаю таковых мест; окромъ перевазы мыта нашого головного и инъшихъ пожитьковъ наших; въ которыхъ то вольностях и пожиткахъ урожоный Стефанъ Немиричъ и потомъки его, преречоныхъ месчанъ в праве Майдебурскомъ и всихъ вольностяхъ и порядкахъ ме стскихъ заховати маеть вечъными часы, не уближа- ючи, одънакъ, правомъ и привилеем месть и местечокъ прилеглыхъ. Тежъ в томъ месте людей такихъ, которыхъ права и привилья коронъные преховывати забороняють, приймовати не мають и не будуть. И на то дали есмо тоть листь нашъ съ подъписомъ руки нашое, до которого, на большую тверъдость, и печать нашу коронъную притиснути есмо казали.Писанъ в Варъшаве на сейме вальномъ коронъмомъ, року Божого нароженя тисеча шестьсоть двадьцать пятого, месяца Февраля 26-го дня. Панованя королевствъ нашихъ - Польского XXXVIII-го а Шведъского - XXXI-го року.
Sigismundus Rex
Christophorus Bakowiecki.
Корпус магдебурзьких грамот українським містам: два проекти видань 20-х - 40-х років ХХ століття /Автори-упоряд. В. Андрейцев, В. Ульяновський, В. Короткий. - К., 2000. - С. 55-56.
Еще по теме № 67 1625 р., лютого 26, Варшава. - Привілей Сиґізмунда ІІІ місту Гоголів на маґдебурґію:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -