№ 68 1625 р., березня 5, Варшава. - Привілей Сиґізмунда ІІІ на маґдебурґію містечку Липове Городище
Prawo Magdeburskie miasteczku Lipowemu-Horodyszczu w uiezdie Xiestwa Czerniochowskiego, Ostafieiowi Mokoseiowi Bаkowieckiemu daneniu.
Право Майдебурское торги и ярмарки местечку Липову урожоного Остафея Баковецкого, войского Володимерского.
Жикгимонт третий, Божию милостю король Польский etc. Ознаймуемо тым листомъ нашым, всимъ посполите и кождому зособна, кому то ведати належит, нинешнимъ и напотом будучмъ. Даль намъ справу урожоный Остафей Мокосей Баковецкий, войский Володимерский, же умыслил местечку своему, Липовому Горидисчу названому, з ласки нашое собе правомъ леннымъ даному, в у[ѣ]зде княжства Черниговского лежачому, - право Майдебурское надати, и теж ярмарки и торги тыдневые уставити, и просиль нас, абысмо ему того позволили. А так мы, король, бачечи в томъ прозьбу его быти слушную, з ласки нашое тымъ листомъ нашимъ, в томъ местечъку его Липовимъ Горидисчу, месчанамъ, подданымъ его, которие тамъ суть и тымъ, што тамъ оседати будуть, право Майдебурское, вольность местскую надаемъ; што через войта, бурмистровъ, радецъ и иншихъ урядниковъ местских, от преречоного, урожоного Остафея Мокосея Баковецъко- го, войского Володимерского, и потомковъ его уставленых, и поданыхъ, во всемъ порядне съпрововано и держано быти мает; и вже оттоль месчане Липовъские права Майдебурского во всих члонъкахъ и артикулах его уживати, и водле него в речах великих и малых завжды се судити и рядити будут сами межи собою и з гостьми, людьми приеждчими, так в ярмарки, торги, яко и над кождымъ часомъ перед урядомъ местским. А мы в томъ моцъ и владзу зуполную войтамъ, бурмистромъ, раде и всему вряду местскому Липовскому даємо во всих справах судовых и в речах кривавих, што ведлугъ бегу права Майдебурского имъ належить, судити, всказовати и винныхъ водле артикуловъ того пърава карати; также и апеляцие правъные до пана своего зверхнего, урожоного Остафея Мокосея Баковецкого, войского Володимерского и потомковъ его не боронити, во всем томъ прикладомъ, яко ся около того порядокъ водле помененого права Майдебурского в местах головных Кракове, Лвове й индей заховует.
К тому дополучаемо въ месте Липовомъ Городисчу ратушъ збудовати, крамы, вагу, постригальню, ятки всякие, лазню посполитую, и што кольвекъ до порядковъ и обходовъ и пожиткови местскому належачихъ мети, и ремесла цеховые, порядкомъ иншихъ таковых мест спородивши, во всем справовати; также мети дозволили есмо, и тымъ листомъ нашим дозволяемъ урожоному Остафееви Мокосееви Баковецкому, войскому Володимер- скому, в ономъ мъсте его, Липовом Городисъчу уставити яръмарковъ в кождый год два - одинъ на светого Петра, свято руское, другий на соборъ светого Иоанна Крестителя, таковое ж свято руское; а торгь каждого тыдъня въ пятницу, - даючи вольность в томъ месте гандли купецтва въсякие вести, корчъмы вольные держати, питьемъ шинковати и речами всякими торговати; до которого места, названого Липова Городисча, подълугъ зъвычаю водности посполитое на ярмарки и торги купцомъ и въсимъ людемъ обывателемъ панствъ нашихъ и чужоземцомъ вольно с товарами всякими приеждчати, торговати, продавати и куповати и всякими речами гандлевати, платечи урожоному Остафееви Мокосееви Баковецко- му, войскому Володимеръскому и потомкомъ его, што повинность несеть мыто торговое по обычаю таковых месть, окромъ переказы мыта нашего головного и иншихъ пожитковъ нашихъ, в которыхъ то вольностяхъ и пожитках урожоный Остафей Мокосей Баковецъкий и потомъки его преречоныхъ месчань, в праве Майдебурскомъ и всихъ вольностяхъ и порядкахъ местъскихъ заховати мает, не уближаючи однакъ правомъ и привильемъ месть и местечокъ прилегълых. Тежъ в томъ местечъку людей таковыхъ, которых права и привилья коронные переховы- вати забороняют, приймовати не мають и не будуть. И на то дали есмо тоть нашъ листь съ подъписомъ руки нашое, до которого на большую тверъдость и печать нашу коронъную притиснути есмо казали.Писані въ Варъшаве на сейме вальномъ коронъномъ, року панского 1625, месяца марца 3 дня; панованъя королевъствъ наших польского - 38-го, а Шведского - 32-го року.
Sigismundus Rex.
Christophorz Bakowiecki.
Корпус магдебурзьких грамот українським містам: два проекти видань 20-х - 40-х років ХХ століття /Автори-упоряд. В. Андрейцев, В. Ульяновський, В. Короткий. - К., 2000. - С. 56-57.