№ 40 1577 р., квітня 14, Вроцлавек. - Уставна королівська грамота про стягування нових мит у Литві
Стефанъ, Божъею милостью король Полскій, великій князь Литовскій. Ознаймуемъ симъ листомъ нашимъ. Што которые мыта новые у великомъ князствѣ Литовскомъ черезъ продка нашого, славное памети Жикгимонта Августа короля, его милости, до лѣтъ шести были постановлены, а панове рада короны Польское и великого князства Литовского, по смерти его королевское милости, зъѣждчаючыся посполу на мѣстцахъ певныхъ, мытникомъ ихъ брати позволили, а потомъ въ Рудникахъ зъѣхавшися, нѣкоторые панове рады и рыцерства часть не- малая великого князства Литовского одны сами оные мыта поднесли и давати не велѣли: нижли вжо за щастливого панованья нашого, будучы намъ у Кнышинѣ, гдѣ панове рады ихъ милость великого князства Литовского мало не вси до насъ прыѣздили, а обмышлеваючы о потребахъ замковъ украинныхъ и о посылку ихъ, тотъ пожытокъ зъ мытъ новыхъ розумѣючы быти прудшы ку поратованью таковое потребы, намъ раду свою на то подали, абы тые новые мыта были браны, на што съ канцлереи нашое листы выдати казали есьмо; за чымъ люди купецкіе утекалися, звлаща мѣсто Виленьское, указуючи права и вольности свое и утяже- нье великое прекладаючы, што мы, господаръ, добрѣ и достаточнѣ уважывши, а яко права и волности свое всякіе отъ королей ихъ милости и великихъ князей Литовскихъ, становъ духовныхъ и свѣтскихъ, также и мѣстомъ нашимъ наданые и отъ насъ попрысяжоные въ зуполной цѣлости на всемъ ховати хотечи, и жадного нарушенья чинити, але во всей цѣлости ихъ заховываючы; вѣдь же съ потребъ кгвалтовныхъ Речы Посполитое ужывали есьмо въ томъ, яко становъ духовныхъ и свѣтскихъ, а меновите людей купецкихъ въ мѣстѣ нашомъ Виленьскомъ, и у иншихъ мѣстѣхь нашихъ великого князства Литовского прыкладомъ того, яко то зъ вѣрного подданства и продкомъ нашимъ оказовали, ижъ бы не жадное повинности, але зъ доброе воли своее учинили, а для поратованья пильныхъ а кгвалтов- ныхъ потребь земскихъ того панства великого князства Литовского плаченья тыхъ мытъ до якого певного часу позволили; гдѣ мѣщане и купцы мѣста Виленьского и иныхъ мѣстъ нашихъ, не будучы до того якою повинностью прыведены, але чынечы.
то для пилныхъ а кгвалтовныхъ потребъ земскихъ, мыта новые, почав- шы отъ нового лѣта въ початку року семдесятъ семого прошлого, до чотырохъ годовъ зуполныхъ, по собѣ идучыхь, платити зезволили, о чомъ и съ пановь радъ ихъ милости особы певные, которые въ томъ зъ ними ся намовляли и становили до насъ писали; а ижъ въ мѣстѣ Виленьскомъ не мало мѣщанъ и купцовъ князя бискупа и капитулы Виленьское естъ, которые яко нашому въ томъ постанове- нью такъ и подданныхъ нашихъ межи собою зезволеньемъ не суть поддави, бо особливыми правами всякіе добра и подданые костельные суть упрывильеваныи; тогды въ томъ ужывали есьмо велебного вь Бозѣ князя Валерыяна, бискупа Ви- леньского, ижъ бы его милость съ капитулою своею о томъ ся намовившы, таковые жъ мыта съ подданныхъ своихъ зъ доброе воли своее постановилъ; што его милость ни въ чомъ не уближаючы, правомъ своимъ духовнымь, отъ королей ихъ милости и великихъ князей Литовскихь, продковъ нашихъ, наданыхъ и отъ насъ поприсяжоныхъ, безъ жадное повинности, одно съ доброе воли своее, для пильныхъ потребъ земскихъ, учынилъ, а тое мыто новое съ подданныхъ своихъ потомужъ, яко и съ подданныхъ нашихъ естъ постановлено, брати позволилъ, на которые мыта новые ачъ кольвекъ устава въ Торуню, по чому отъ чого мѣло быти брано, естъ съ канцлереи нашое выдана и на коморы мытные розослана; а вѣдже, ижъ подданные наши люди купецкіе плаченье тыхъ мытъ новыхъ зъ утя- женьемъ своимъ быти розумѣючи, о ульженье ихъ просили, тогды мы и въ томъ фолкгу дѣлаючы, съ тое уставы, которая была выдана, мыта скопного [пробіл] частью, а отъ иншихъ товаровъ всякихъ, яко есьмо теперешнею уставою тое мыто зъ меньшыми брати постановившы [пробіл], часть мыта скопного, первей постановленого, отпущаемъ, а отъ иншыхъ речей, водлѣ теперешнее уставы нашое, до скарбу земского великого князства Литовского даное, плаченье мытъ новыхъ маеть быти давано такъ, ижъ на выстью чотырохъ годовъ вышеймененыхъ всякихъ мытъ новыхъ скопныхъ [пробіл] частью нижъ першой уставѣ, съ того дня выда- ной, описано, а отъ иншыхъ речей водлѣ уставы теперешнее платити мають; а по выстью тыхъ чотырохъ годовъ, въ семъ листѣ нашомъ описаныхъ, вси обыватели великого князства Литовского отъ плаченья тыхъ мытъ новыхъ волни будуть, такъ ижъ на вси прышлые потомные часы отъ насъ, господара, и отъ потомковъ нашихъ николи жадные мыта и поборы, або якимъ кольвекъ именемъ новоназваные пожитки становлены быти не мають, окромъ того, што бы ся на соймѣхъ великихъ вальныхъ, за зезволеньемъ всихъ становъ, уфалило и постановило, яко жъ и тое теперешнее, для потребы Речи Посполитое, постановенье мыта нового ничого правамъ, вольностямъ и свободамъ становъ духовныхъ, свѣтскихь и мѣсткихъ ничымъ шкодити, и намнѣйшого уближенья правамъ и вольностямъ духовнымъ, земскимъ и свѣтскимъ, мѣстскимъ прыносити не можеть и не будеть, вѣчными часы. Што все упевняючи, дали есьмо станомъ духовнымъ, свѣтскимь и мѣстскимъ, мѣста нашого Виленьского и иныхъ всихъ мѣстъ нашихъ великого князства Литовского сесь нашъ листь съ подписомъ руки властное нашое, до которого на твердость и печать нашу прыложити есьмо росказали.Писанъ у Вроцлавку, лѣта Божъего Нароженья 1577, мѣсяца апреля 14 дня. - Подпись руки господарское.
Акты ЮЗР. - СПб., 1863. - Т. 1. - С. 210-211.