№ 26 1534 р., травня 1, Вільно. - Уставна грамота польської королеви Бони сенівським міщанам з призначенням грошового збору до державної скарбниці з тих із них, які триматимуть медові й пивні корчми

Бона, Божьею милостью королевая Полская, великая княгиня Литовская, Руская, Пруская, Жомоитская, Мазовецкая и иныхъ. Били намь чоломъ войтъ и вси мѣщане мѣстечка нашого Сеневскіи и покладали передъ нами листъ нашъ, которымъ листомъ допустили есмо тамъ на Сеневці садитися мѣстечку, и воли есмо была тымъ, которые тамъ осѣли, дали на десеть лѣтъ; ино они повѣдили намъ, ижь вже тое мѣстечко людми осѣло и воля оная десеть лѣтъ вжо имъ вышла; а такъ, кгдыжъ вже оная воля вышла, били намъ чоломъ, абыхмо имъ листомъ нашимъ назнаменовали, штобы они намъ съ того своего мѣстечка мѣли давати за поплаты.

Ино мы, вчинивши о томъ обмову съ старостою нашимъ Пинь- скимъ, Кобриньскимъ, Клецкимъ, Городецкимъ и Рогачовскимъ паномь Иваномь Михайловичомъ, и вырозумѣвши тому, ижь тамъ естъ мѣстечко малое и убогое, постановили есмо на тое мѣстечко таковый платъ: который мѣщанинъ держати въ себе будеть корчму медовую и пивную, тоть маеть дати на насъ плату у годъ копу грошей; а который держати будеть едно корчму пивную, тотъ маеть давати двадцать грошей; а хто корчму медовую безъ пива будеть держати, тотъ маетъ давати у годъ полкопы грошей; а которые мѣщане корчомъ въ себѣ мѣти не будуть и жаднымъ шинкомъ не будуть ся обходити, тыи повинни будуть давати въ годъ отъ дому по шесть грошей; а иншихъ имъ, окромъ того, никоторыхъ на насъ дачокъ не давати, нижли если бы коли положена была на все паньство нашо великое князство Литовское серебщизна для потребы Речи Посполитое земское, тогды они серебщизну будуть повинни тежъ платити. И на то дали есмо тымъ мѣщаномъ Сеневскимъ сесь нашъ листъ и зъ нашою печатью.

Писанъ у Вилни, подъ лѣты Божьего Нароженья 1534, мѣсяца мая 1 день, индиктъ 7.

Акты ЮЗР. - СПб., 1863. - Т. 1. - С. 84.

<< | >>

↑

Источник: Хрестоматія з історії України литовсько-польської доби / Упоряд. Т Гошко. Львів: Видавництво Українського Католицького Університету 2011. 2011

Еще по теме № 26 1534 р., травня 1, Вільно. - Уставна грамота польської королеви Бони сенівським міщанам з призначенням грошового збору до державної скарбниці з тих із них, які триматимуть медові й пивні корчми:

- Давня історія України (до VI ст.) - Загальна історія України - Україна 1917-1921 рр - Україна за радянських часів - Україна у XVI - XVIII стст. - Україна у середні віки (VII-XV ст.) -

- Всеобщая история - История Древнего мира - История религий - История России - Історія України -