№ 24 1529 р., листопада 30, Радомль. - Уставна королівська грамота про стягнення мита з товарів, які провозять через замок Городецький, що належить королеві Боні
Жыкгимонтъ, Божью милостью король Польски, великій князь Литовскій, Рускій, Прускій, Жомоитскій, Мазовецкій и иныхъ. Чынимъ явно симъ нашимъ листом: жедали насъ королевая наша и великая княгиня ее милости Бона, абыхмо дали и дозволили ее милости установити мыто великое головное, для пожытку ее милости въ замку ее милости Городецкомъ: ино мы зъ ласки нашое на жеда- нье ее милости то вчынили, тое мыто великое головное и тому замку Городецкому ее милости есмо дали; маеть ее милость тамъ мытниковъ своихъ зъ моцы своее установити, который жъ мытники мають мыто брати тымъ обычаемъ: вси купцы Турецкіи и Волоскіи и всякій иныи нашихъ и чужыхъ которыхъ кольвекъ земль, который бы мѣли съ товары своими ходити во паньствѣхъ нашихъ, а шли бы черезъ Городокъ и черезъ повѣтъ Городецкій сухимъ путемъ и воденымъ, то есть рѣкою Прыпетью, Ветлицою и Горынею, тыи вси мають отъ товаровъ своихъ ошацовавъшы отъ каждое копы по два гроши дати; такъ тежъ вси наши купцы великого князьства Литовского, князскіи и паньскіи и духовный Рымского и Греческого закону, который кольвекъ черезъ тотъ замокъ Городокъ и черезъ повѣтъ Городецкій сухимъ и воденымъ путемъ пойдуть, тыи вси потомужъ мають давати отъ товаровъ своихъ отъ кождое копы ошацовавши по два грошы; а который купецъ будеть провадити соли телегами або камягами[463] тымъ жо вышописанымъ сухимъ и водянымъ путемъ до Кіева, або на иншыи который кольвекъ мѣстца, то маеть давати отъ кождое телеги, колко ихъ будеть зложоно въ которой комязѣ, по двадцати грошей, и надъ то старого цла по двенадцати грошей отъ кождое комяги; а который бы тежъ купцы хотѣли йти до Литвы возы або комягами, хотячы проѣжчати мыто нашо Луцкое, тыи вси мають дати цло у Городку або въ Пиньску, подлугъ тоежъ уставы нашое. А тыи мытники королевое ее милости, который будуть уставлены въ замку ее милости Городку, ото всихъ купцовъ, никого не выйму- ючы, со всихъ ихъ товаровъ мають брати мыто отъ кождое копы, подлугъ обычая, иншыхъ нашихъ мытъ головныхъ, какъ жо тыи мытники ее милости мають на ее милость тое мыто брати и въ немъ ся справовати и радити, подлугъ тое уставы на- шое господарское.
На тожъ есмо ее милости королевой нашой и великой кнегини Бонѣ далъ сесь нашъ листъ зъ нашою прывѣсистою печатью.Писанъ въ Радомли, подъ лѣтъ Божьяго Нароженья 1529, мѣсяца ноября 30 день, индыктъ 3.
Акты ЮЗР. - СПб., 1863. - Т. 1. - С. 77.