№ 6 1524 р., листопада 21, Краків. - Підтвердна грамота польської королеви Бони[283] боярину Клецькому Горяїну на маєтки у Клецькому повіті
Бона, зъ Божіей милости королевая Полская, великая кнегини Литовская, Руская, Пруская, Жомоитьская и иныхъ. Чинимъ знаменито симъ листомъ нинѣйшимь и напотомъ будучимъ, кому того потребъ будеть вѣдати, або чтучи слышати.
Билъ намъ чоломъ бояринъ нашь Клецкій, на имя Горяинъ, и новѣдилъ передъ нами, штожъ маеть имѣнье свое въ повѣтѣ Клецкомъ, двѣ земли, на имя Ревятевщина а Дудовщина, которые жъ земли далъ ему предокъ нашъ, небожчи- къ князь Иванъ Ярославичъ передъ пятминадцать годы, и былъ въ державы и во впокою тыхъ земль за князя Ивана и за сына его князя Федора; на штожъ онь, съ полецанья нашого, передъ старостою нашимъ Пинскимъ и Клецкимъ врожонымъ Иваномъ Михайловичомъ и бояры нашими Клецкими доводъ слушный учинилъ, ижъ тое имѣнье далъ отцу его князь Иванъ; и билъ намъ чоломъ, абыхмо ему на то дали нашь листъ и то ему потвердили листомъ нашимъ на вѣчності. И мы зъ особливое ласки нашое на его чоломбитье то вчинили, на то дали ему нашь листъ, и то ему потвержаемъ тымъ нашимъ листомъ на вечность, ему самому и его жонѣ, и ихъ дѣтемъ, и напотомъ будучимъ ихъ счадкомъ, вѣчно и непорушно, со всимъ съ тымъ, што къ тымъ землямъ здавна прислухаеть и какъ ся въ собѣ мають, а то кромъ ображенья правь нашихъ и потомковъ нашихъ и звычаевъ старыхъ князьства нашого Литовского, которые заховываемъ въ цѣлости; а маеть онъ намъ и нашимъ потомкомь, и его дѣти, и щадкове ихъ служити службою воєнною, часу войны, такъ какъ и передъ тымъ служивалъ; и тежъ маетъ въ ловы наши ѣздити, какъ того часъ; а люди его маютъ замокъ нашъ Клецкій оправляти водлѣ давного обычая. А што ся дотычетъ звѣру въ его имѣньи, то люди его маютъ осочити и дати вѣдомо на замокъ старостѣ нашому, а не маетъ онъ у своихъ ловѣхь, а ни люди его звѣру ловити до того часу, нижли староста нашь будеть у его имѣньи ловити, принамнѣй разъ у году; и тежъ у въ озерехъ своихъ не маетъ онъ духовъ рибныхъ ловити, олижъ на замокъ маетъ вѣдомо дати. А на што былъ передъ тымъ повиненъ, мы и теперъ его съ того не выймуемъ, А надъ то и печать нашу казали есмо привѣсити къ сему нашому листу. При томъ были: велможный Миколай Вольскій, охмистръ нашь; а князь Янъ Левицкій, канторі, Плоцкій, писарь нашь Латыньскій.Писанъ у Краковѣ, подъ лѣты Божьего Нароженья 1524, мѣсяца ноября 21, индиктъ 13.
Акты ЮЗР. - СПб., 1863. - Т. 1. - С. 65-66.
Еще по теме № 6 1524 р., листопада 21, Краків. - Підтвердна грамота польської королеви Бони[283] боярину Клецькому Горяїну на маєтки у Клецькому повіті:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -