№ 28 1608 р., Львів. - Окружне послання Львівського Ставропігійського братства до всього православного люду з повідомленням про гоніння від поляків і з проханням про матеріальну допомогу
Преосвященнымъ ихъ милости господиномъ отцем архиепископом и епископом, и достойно почестным архимандритом, игуменом, о Христѣ честным протопопом и попом, о Святѣм Дусѣ возлюбленным архидіаконом и діаконом, и всему причту святыхъ Божіих церквей.
Ясневелможным их мл. княжатом, паном воеводам, кашталяном и их мл. паном старостам, урожоным паном земяном, шляхетним паном войтом дѣдицким, славетним паном мещаном, и опатръным паном радцам, и всѣм въсточнаго православіа христіаном сыном Стонским. Благодати, мира, милости, здравія и всяких помыслных потѣх от всемогущаго въ Троици славимаго Бога брацтво Ставропигіон Успеніе Пресвятыя Б[огородиц]а Лвовское в. м. уприйме мѣти зычитъ.Розуміємо тому, иж не без вѣсти есте сут в. м. о том, як отдавныхъ лѣтъ утя- жени естесмо суть зде въ Лвовѣ ярмомъ египетъское неволі невыповедимых бѣдъ, сповлочанемъ задворных и сеймовых уставичных правъ и утисковъ вшеляких а праве знищеня и выгнаня от вшелякихъ обходовъ и до самое наменъшое иглы и шилця, чим бы толко человѣкъ живъ бити моглъ, забороняють намъ панове народа Полскаго люде уживати. А то набарзѣй за отступлением старших наших бывших духовных: митрополита и владыков, а лекгуючи и нас за ними в той же отступленіа образ к послушенству их притягаючи. Которыми то бѣдами южесмы сут змучени и знищени. А иж мы, хотячи тому то злому промысла их пожарови не допустити и на нас бідам таковым найти, на собѣ есмы с покорою и над можность нашу по сей час зносили: промышляючи добрая пред Богом и человѣки, не хотячи всенародное славы и утѣхи христіанское зде угасити за приводом и праве примусом святѣйших натріархов, и на он час еще всѣх купно будучих, митрополита и епископовъ наших землей сих Россійских, кгдыж они, мѣсто и мѣсце способнеишое на то Лвовъ усмотривши и сеимовыми привилеими умоцнивши, усиловали нас на то и над силу нашу двигнути росказали то есть церковнаго мурованя прекрасным ділом церковным, яко Цару всѣх Христу Богу дом хвалѣ его уробити.
Ку тому школу наукъ христіанских кгрецких и словенских, дѣтемъ вашимъ въсѣмъ посполите фундовати, иж бы, піючи въ чужих студницах воды наук иноязыческих, виры своей не отпадали, зачим праве и всенародное згиненіе барзо близко ходит.Тутеж и друкарню писма греческаго и словенскаго, выкупивши за немалую суму грошей, двигнулисмы за ласкою Божіею, на которые той потребы, иле на он час у початку обетниц для ратунку на то было много, от предних звлаща на- чалнейших в роде нашом Россійском; але ку скуткови про завист а ненавист от вселукаваго діавола пріити, тѣсенъ и жесток барзо. Хоцаи так речем, иж не подано нам руки помощи на все тое праве нічого, але иѣеще зазленя и прешкодъ и от мнящихся быти нашихъ: бѣдъ, гоненіа, удаваня нас зле утръпѣли есмо барзо много, аж мусѣлисмо до обцых людей с тым ся удавати инож и там датковъ мало, а присловя и вымовов много: чого юж тыж и сам встыд не допущает писати нам. Што за примовки и што за посмовиска относим за то, о Боже?! Нужда и нам съ пророком Исаіемь рещи: «слыши небо и внуши земле», що тръпим зде в том то Лвовѣ! Умыслъ теды и способъ для остатнего поратованя тых всенародных бід и потреб с порады и волѣ их м. преложоных духовных наших ест такій. На што и листы с печатми и подписы рукъ ихъ м. самых далы сут на то, абы внести просбы до всѣхъ посполите людей ихъ м. пановъ шляхтъ мѣстъ и містечок, и селъ навет, просити всенародное поратованіе на так великіе всего посполитого добра ясные потребы. Поневаж сеимъ близко надходитъ, до котораго неотрочне становитися на суд мусимо, кгдьж справа тая нашя на декреті его к. м. до сейму станула. Лечъ в стыду и жалости полным будучи с писаніем сим удатисмыся до всіхь, в. м. мусѣли прикладомъ невърныхъ жидовъ въ Лвовѣ, невѣрний и каменосердечный твердоши- иныи народ, будучи отверъженыи от лица Божіа, ратунок своим отвсюду подали, и вскурали противно отцом езуитомъ, не дали взяти школы собѣ, албо божницѣ своей жидовской; въ Лвовѣ.
Нам теды бовѣм не божницу жидовскую берут, але всенародное христіанское набоженство и волности вышпотити усілують. Кто тое одно бачити хочет, що то ест? и що за собою поносит той затягъ справы тоеи, и што за вѣкъ живемо? и с ким пря и о што? и прошто албо про кого? до скутку справы пріити не могут, през так многій вѣкъ звлока. А претож мы, уповаючи на Бога и на ваше христіанское поратованіе, послали есмо до ваших милостей достоверных мужей, избравши с посродку нас братію наш, на имя пана. Просячи унижоне о милостивое баченя и поратованя на такъ важные потребы всѣхъ вас, посполитые: подайте руку помощи з милостивое ласки вашое, или въмѣсто милостині, или у способ позычаный. Їмо Богъ подасть до сердецъ в. м. и тое приймем за певным ру- кописаніем нашим и постановеніемь на певный часъ отдати. Толко абы на нас в чом не сходило, о том то всѣмъ в. м. знати даємо. За що и сам Богъ з высокого маєстату Своего заплатою будет, и тая посполитая потреба вѣчное памяти вас сподобит, и Богъ ласки, покоя и въсякои утѣхи да будетъ съ вами. Аминь.Дан въ Лвовѣ дня, року__________ 51 Ваших милостей упріиме зычливые брацтво
Леополите.
Архив ЮЗР. - К., 1904. - Ч. 1. - Т. ХІІ. - С. 526-529.