№ 58 1592р., жовтня 20, Варшава. - Привілей на магдебурзьке право місту Лубни (Олександрів) короля Сиґізмунда ІІІ
Право Майдоборское мещанам Алексанъдровскимъ.
Prawo Magdeburskie miastu Alexandrowu.
Жикгимонт третий.
Ознаймуемъ там листом нашымъ всем вобец и каждому зособна, которым того ведати належыт, нинешним и напотом будучымъ.
Далъ намъ справу урожо- ный князь Александер Вишневецкий, староста нашъ Черкаский, Каневъский, Любецъкий и Корсунский, ижъ на врочыщу Любне, а тепер ново названомъ Александрово, на властъной маетности своей вечыстой, в земли Киевъской, над рекою Сулою лежачом, для убезпеченя и заслоны панствъ коронныхъ подлугъ правь посполитыхъ твержу замокъ потребне будуетъ и место садит и закладаеть. И просилъ нас, абыхмо тому месту его на врочыще Любне названому Алексанъ- дрову право Майдеборское надали и всякие свободы, пожитки и порядок в нем, прикладом иншых упривильеваных головных мест в панствах нашыхъ, спорядити и постановити дозволили, такъже ярмаръки, торги и корчмы подали, купецтвъ, гандлевъ и инъших всяких объходов допустили. Про то мы, уважывъшы в том быти слушную прозбу князя Алексанъдра Вишневецкого, з ласки нашое кро- левъское, преречоному местечку его Алексанъдрову и подданымъ его мещаномъ тамошнымъ, людемъ волнымъ, которые там суть и которые потом приходити и оседати там будуть, право Майдоборское и вольность местъскую надаем, што через войта, бурмистра и радец, и инъшихъ врядниковъ местскихъ, которыхъ они межъ себе людей годных и в праве беглых, цнотливых и неподозраных, волное обиранье от нас имь и тым листом нашымъ наданое маючы, становити мают, с потверъженемъ пана свого зверхного, через которых всякие справы порядне и справне йти мают, и вжо оттоль мещане Алексанъдровъские права Майдебурско- го во всих члонкахъ и артыкулехъ его ужывати и оным в речах великихъ и малых завжды ся радити и судити будуть сами меж собою, гостми и людми приежчими, так в ярмаръки и торги, яко под кождымъ часом перед врядом своимъ местскимъ, в том моц и владность суполъную теперешнему и напотом будучим войтомъ, бурмистром, раде и всему врядови местскому даемъ во всих справахъ судовыхь и в речах крвавых, што подлугъ бегу права Майдеборского им належати будет, судити сказывати и винныхъ водле артыкуловъ того права Майдебуръского карати; также и апеляцыи правъное до зверхного пана их, князя Алексанъдра Вишневенького, старосты Черкасского, боронити укривъжонымъ не мают во всем прикладомъ, яко ся около того порядокъ водле помененого права Майдеборского в местахъ нашыхъ головныхъ Кракове, ве Лвове и инде заховуеть. И тому допущаем в месте преречоном ратуш збудувати, крамы, вагу, постригальню, ятки всякие, лазню посполитую, и што колвекъ до порядку объходовъ и пожытковъ местскихъ належати мает, збудовати, и ремесла цеховые спорядивъшы, яко в ыншыхъ местех есть, во всем справоватися мають. Также дозволили есмо и тым листомъ нашым дозволяемъ, князю, старосте нашому Черкасскому, в оном месте его уставити ярмаръки два в кождый год, то есть одинъ на денъ [...], а другий на денъ [...], а торги в кождый тый денъ [...], даючы водность в том месте его купецтва гандли всякие вести и карчмы волные держати, питьемъ и речъми вшелякими шынко- вати, до которого места Алексанъдрова, подлугъ звычаю волности посполитое, на ярмаръки и торги тамошные и купъцом и всим людем обывателемъ панствъ нашыхъ и чужоземцом волно с товары всякими и приеждчати, торговати, продавати, куповати, товары за товары меняти, плятечы на старосту Черкасского, вышъ помененного, и потомки его, чыя што повинность нести бздеть, мыто торговое по обычаю таковых мест, окромъ переказы мыта нашого головъного и иншихъ пожытковъ наших. А тое волности и пожытковъ помененый князь Александер Вишневецкий и потомки его, водле права, яко и инъшые обыватели, рыцерство оного краю, слушне ужываючы, место свое Алексанъдрово и мещанъ тамошних в праве Майдеборскомъ и во всяких волностях и порядкахъ местскихъ, водлугъ сего месту нашого, заховати мають; до того тежъ тому жъ месту Александрову сим же листом нашимъ до права их надаем печать местскую, гербъ [...], которою печатью в том месте Александрове вряд местский, вси справы права Майдеборс- кого тою печатью печатуючы и отправуючы, вечне ужывати оное мають, варуемъ; тежъ то абы в томъ месте, преречономъ Алекъсандрове, люди такие не были, которыхъ в местехъ и в местечкахъ нашыхъ переховывати и справ яких мети права и привилея коронные забороняють. А для лепшои веры и умоцненя беречы сес лист рукою нашою подписавшы, печать нашу коронную до него привесити есмо росказали.Писан у Варшаве, лета божого нароженя тисеча пятьсот деветдесятъ второго, месяца окътебра двадцатого дня, а кролеванья нашого року пятого.
«Sigismundus Rex»
Florian Oliessko.
Корпус магдебурзьких грамот українським містам: два проекти видань 20-х - 40-х років ХХ століття / Автори-упоряд. В. Андрейцев, В. Ульяновський, В. Короткий. - К., 2000. - С. 48-49.
Еще по теме № 58 1592р., жовтня 20, Варшава. - Привілей на магдебурзьке право місту Лубни (Олександрів) короля Сиґізмунда ІІІ:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -