№ 8 1576 р., 7 липня. - Лист брацлавської шляхти королеві Стефану Баторію про те, щоб королівські укази писали їм не польською, а руською мовою
Наяснѣйшій, милостивый королю, пане а пане нашъ милостивый! Даны суть листы, черезъ дворянина вашей королевской милости пана Оршевского, бра- тыи нашой, найменшимъ слугамъ и подданнымъ вашой королевской милости, писмомъ Польским писаные, позываючи ихъ передъ маестатъ вашей королевской милости, нашого милостивого пана.
Хотяжъ, наяснѣйшій милостивый королю, за постановленьемъ унъи, листы съ канцлерыи вашой королевской милости не инакимъ, одно Рускимъ писмомъ маютъ быти выдаваны: мы теды, наяснѣйшій милостивый королю, ни въ чомъ не будучи есмо о тые позваные братыя наши спротивны воли и росказанью вашой королевской мило сти, вже на тое росказанье вашой милости господарское ѣхати къ вашой королевской милости были готовы. Нижли, будучи есмо подъ тотъ часъ у великомъ затревоженью и небезпеченьстви отъ непріятеля отъ Татаръ, отъ себе есмо ихъ не пустили; а вшакожъ мы предься послали къ вашой королевской милости брата нашого, пана Яцковского, и покорными нашими королевской мило сти, нашого милостивого пана, просимо, абы ваша королевская милость, зъ милостивой ласки своей королевской, тыхъ братыю нашу позваныхъ отъ року й отъ позвовъ вольными учинити и заховати росказати рачилъ: кгдыжъ, наяснѣйшій милостивый королю, то ся намъ диетъ надъ право й вольности наши, ижъ листы съ канцлерыи вашой королевской милости до насъ писмомъ Польскимъ выдаваютъ. За што и впродъ вашой королевской милости, нашого милостивого пана, покорными нашими прозбами просимо, абы ваша королевская милость при привилею и свободахъ нашихъ насъ заховати и до насъ листы съ канцлереи вашой королевской милости Рускимъ писмомъ выдавати росказати рачилъ; а напотомъ, кгды хто въ чомъ виненъ зостанетъ, справоватися мусить. А за тымъ найнизшые службы наши милостивой ласцѣ вашой королевской милости, господарю нашому, залецаемъ.Писанъ въ Браславли, мѣсяца Іюля 7 дня. - «Найнизшые слуги и вѣрные подданные в. к. м., вся шляхта, рыцерство воеводства Браславского покорно низко чоломъ бьютъ».
Акты ЗР. - СПб., 1848. - Т. 3. - С. 187.
Еще по теме № 8 1576 р., 7 липня. - Лист брацлавської шляхти королеві Стефану Баторію про те, щоб королівські укази писали їм не польською, а руською мовою:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -