№ 38 1571р., лютого 10, Варшава. - Привілей Сиґізмунда Авґуста мінським міщанам на заснування двох ярмарків і на стягнення мита з товарів, які провозять через мости, збудовані на ріці Свислоч
Жикгимонтъ Августъ, Божью милостью король Полскій, великій князь Литовскій, Рускій, Прускій, Жомоитскій, Мазовецкій, Лифлянтскій и иныхъ. Оз- наймуемъ симъ нашимъ листомъ, нинѣшнимъ и напотомъ будучимъ, всимъ посполите и кождому зособна.
Били намъ чоломъ бурмистры, радцы и вси мѣщане мѣста нашого Меньского и повѣдили передъ нами, ижъ отъ немалого часу яко зъ непріятелемъ нашимъ княземъ великимъ Московскимъ валка почалася, гет- мани и войска наши и послы великіе черезь мѣсто тамошное Менское часток- роть хоживали, и людъ нашъ служебный немалый часъ уставичнѣ тамъ у нихъ мѣшкаючы, великіе трудности имъ задавалъ, для чего на маетностяхъ своихъ знищенье немалое приняли; а къ тому теперъ зъ росказанья нашого порядокъ въ мѣстѣ тамошнемъ чинечи, до мы свои знову на иншіе мѣстца переносять и будують, звлаща отъ Пана Бога великимъ неврожаемъ отъ колька лѣтъ, скарани будучи, просили, абыхмо ласку нашу господарскую учинили, а для запоможенья того мѣста Меньского и ихъ подданныхъ нашихъ два ярмарки въ мѣстѣ Менско- мъ, въ кождый годъ на часы певные, то есть одинъ на день светого Ильи пророка, а другій на три кроли свято Рымское звычаемъ иншыхъ мѣстъ нашихъ постановили; а къ тому особливѣ, на двохъ мостѣхъ, которые она на рѣцѣ Свислочы на передмѣстью Менскомъ власнымъ своимъ накладомъ збудовали, мостовое отъ людей купецкихъ, по певной уставѣ; имъ на себе брати дозволили, и то все листомъ нашимъ имъ упевнили и утвердили. А такъ мы, зъ ласки нашое господарское, на чоломбитье ихъ мѣщанъ нашихъ Менскихъ, съ причинъ верху описаныхъ, то есьмо учинили, и у мѣстѣ Менскомъ два ярмарки въ кождый годъ, одинъ на день светого пророка Ильи, а другій на три кроли свято Рымское постановили есьмо, и симъ листомъ натимъ постановляем на вечные часы, которые отъ дня першого святъ помененыхъ почынатися, а черезъ двѣ недели зуполные стояти мають. А на тые ярмарки люди купецкіе всякого стану, такъ съ панствъ нашихъ, яко и чужоземскіе, зо всякими товары своими до мѣста Менского ѣздити, ган- длевъ купецства и товаровъ вшелякихъ уживати мають, не платечы на коморѣ мытной Менской и на прикоморкахъ, ку ней належачихъ, мытъ нашихъ старыхъ и новыхъ, торгового и иншихъ никоторыхъ поборовъ и податковъ, отъ речей нижей описаныхъ, то есть отъ жита и отъ иного всякого збожъя, отъ хмѣлю, и отъ быдла живого, и отъ мяса свѣжого и солоного, бидлячого и свинного и от рыбъ свѣжих, солоныхъ, вялыхъ и мерзлыхъ, отъ белужины, осетрины, и отъ икры осетриное, и отъ вьюновъ, и отъ иныхъ всякихъ рыбъ великихъ и малыхъ, отъ меду пресного, отъ соли и селедцовъ, и отъ иныхъ всякихъ речей ку живности належачихъ, яко кольвекъ названыхъ, черезъ цалые двѣ недѣли, поколь ярмарокъ стояти будеть, такъ, ижъ хто кольвекъ тыми вышейменоваными речми въ тые ярмарки торговати и ихъ продавати у мѣстѣ Менскомъ будеть, в тые хто то купить, на ко- морѣ Менской и на прикоморкахъ ку ней прислухаючихъ мытъ нашихъ старыхъ и новыхъ, также поборовъ торгового и иншихъ платовъ мытникомъ и арендаромъ нашимъ, и тежъ старостамъ Менскимъ, врядникомъ ихъ, и вряду мѣстскому и никому иншому ничего давать и платити не мають и не будуть повинни, вѣчнѣ. А къ тому дозволили есмо и симъ листомъ нашимъ позволяема мещаномъ нашимъ Меньскимъ, вѣчными часы, брати на мостѣхъ тыхъ, которые на рѣцѣ Свислочы накладомъ своимъ збудовали, мостового зъ людей купецкихъ отъ кождого коня по полугрошку, а отъ людей сельскихъ, которые збожъе до торгу на продажу возять, отъ воза по пенязю одному; але отъ шляхты и людей переѣждчыхъ и отъ подводъ шляхетскихъ, которые бы збожъе або иншіе якіе речи ихъ власные не на продажу везли, мостового брати не мають. А тые мосты на Свислочы мѣщане наши завж- ды знову будовати и направовати будуть повинни. И на то дали есьмо мѣщаномъ нашимъ мѣста Меньского сесь нашъ привилей, который на твердость всихъ речей въ немъ описаныхъ подписавшы рукою нашою господарскою, в печать нашу къ нему привѣсити есьмо росказали.Писанъ у Варшавѣ, лѣта Божъего Нароженья тисеча пять сотъ семдесятъ первого, мѣсяца Февраля десятого дня. У того привилею, на паркгаменѣ писаного, подписъ руки властное его королевское милости, по Латинѣ, тыми словы: Sigismundus Augustus rex., и печать привѣсистая подканцлерская великого княз- ства Литовского; а подписъ писарская въ тые слова: Матей Савицкій, писаръ, староста Мельницкій, войскій Дорогицкій.
Акты ЮЗР. - СПб., 1863. - Т. 1. - С. 180-181.
Еще по теме № 38 1571р., лютого 10, Варшава. - Привілей Сиґізмунда Авґуста мінським міщанам на заснування двох ярмарків і на стягнення мита з товарів, які провозять через мости, збудовані на ріці Свислоч:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -