№ 29 1545 р., квітня 15. - Привілей польського короля Сиґізмунда Авґуста Києву на безмитну торгівлю у Великому князівстві Литовському
Жикгимонтъ Августъ, Божью милостью король Полскій, великій князь Литовскій, Рускій, Прускій, Жомоитцкій, Мазовецкій и иныхъ, княземъ и паномъ, воеводамъ, старостамъ, державцамъ, намъстникомъ, бояромъ и дворяномъ нашимъ, духовнымъ и свѣтскимъ, и всимъ мытникомъ по отчизнѣ нашой великому князству Литовскому.
Тыхъ часовъ присылали до насъ войтъ, бурмистры и рядцы, и вси мѣщане мѣста нашого Кіевского, жалуючи и велико собѣ обтяжаючи о томъ, ижъ што предокъ нашъ славной памяти, Александръ король его милость, для ихъ великого впаду, который они мають на кождый годъ отъ непріятелей нашихъ поганства Татаръ, отпустилъ имъ мыта наши и тежъ вси мыта князскіи, панскіи и боярскіи, духовныхъ и свѣтскихъ, сухимъ путемъ и водою по всей отчизнѣ нашой великому князству Литовскому вѣчно, въ которыхъ-колвекъ мѣщанъ Шевскихъ будеть листъ подъ ихъ печатю мѣстцкою. О чомъ же первей того наяснѣйшій король его милость, панъ а отець нашъ, до васъ писати рачилъ подъ зарукою его милости тисячью копами грошей, приказуючи вамъ, аже бы есте вездѣ отъ нихъ мыта не брали и заховываючи ихъ во всемъ подле привилья Александра короля его милости, то пакъ лей вы, не дбаючи о листы и росказанье его кролевскіи милости, предел уво имъньяхъ своихъ мыта на нихъ вездѣ берете и товары ихъ гамуєте, въ чомъ же ся имъ великая кривда и тяжкость отъ васъ дѣеть. Чого бы есте надъ привилея и листы короля его милости чинити имъ не мѣли. Который жъ листы короля его милости они тыхъ часовъ передъ нами покладали, мы ихъ огледавши, въ томъ ихъ заховываемъ подле привилья Александра и тежъ листа отца нашого, королей ихъ милости, и приказуемъ вамъ подъ закладомъ нашимъ тисячью копами грошей, а жебы есте отъ тыхъ мѣщанъ нашихъ Кіевскихъ, въ которыхъ бу- деть листъ подъ ихъ мѣстцкою печатью, отъ товаровъ ихъ мыта на нихъ вездѣ по нашимъ мытамъ, по князскимъ и панскимь, и боярскимъ, духовнымъ и свѣтскимъ, сухимъ путемъ и водою, не брали и вездѣ ихъ добровольне а безмытне пропускали, и въ томъ имъ никоторое кривды и тяжкости и шкоды не дѣлали конечно, абы то инакъ не было; пакли жъ бы есте о росказанье нашо ничого не дбаючи, предся въ томъ имъ кривды и шкоды дѣлали, тогды вѣдайте певне, ижъ кажемъ на таковыхъ противныхъ вси шкоды, ижъ который ся въ томъ имъ стануть, и тежъ тую заруку нашу на имѣньяхъ вашихъ моцно отправити. Писанъ у Вильни, подъ лѣтъ Божого Нароженя 1545, мѣсяца апреля 15 дня, индикта 10. - «Иванъ Горностай».Войтъ, бурмистры, радцы, лавнице и присеж. мѣста господаря короля его милости Кіевского, списавши тую копею зъ листу господарьского, дали есмо мѣщанину его кролевское милости мѣста Кіевского Василью Федоровичу Кобы- зевича, подъ печатью мѣстскою ратушною.
Акты ЮЗР. - СПб., 1863. - Т. 1. - С. 299.
Еще по теме № 29 1545 р., квітня 15. - Привілей польського короля Сиґізмунда Авґуста Києву на безмитну торгівлю у Великому князівстві Литовському:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -