№ 23 1518 р., січня 9, Київ. - Уставна грамота київського воєводи Андрія Немировича про те, щоб ремісничі цехи у Києві перебували у віданні ратуші
Я, Андрей Немировичь, воевода Кіевскій, вызнаваемъ симъ нашимъ листомъ войту и бурмистромъ, и радцамъ, и всимъ мѣщаномъ мѣста Кіевского. Мовили намъ о тые врады мѣстскіе, которые жъ перво сего ихъ къ замку вжывали а на мѣсто къ ратуши, и на то они покладали передъ нами данину прывилья и листы господара нашого, короля его милости Жыкгимонта, и въ тыхъ ихъ прывильяхъ выписано стоить: ижъ его милость господаръ нашъ, тые вси врады городовые отдаливши отъ замку своего, и далъ ихъ мѣщаномъ къ ратушу мѣсту своему вжывати и въ нихъ се справовати, немнѣй, яко у ихъ прывильяхъ имъ выписано и какъ ихъ право Майде- борское несеть, кравцы, кушнеры, шевцы, постригачи, золотари, стрѣлники, винники, лучники, ковали и радовницы, мыто рыбное, повѣчщыны, грошъ варовый, мыто соляное; а съ тыхъ всихъ ремесниковъ его милость господаръ нашъ на замокъ свой вынялъ по два ремесники мѣти къ замку; естли бы тежъ которая потреба господарская и земская вказывала, а не наша, тыхъ всихъ ремесниковъ, тогды они вси мають робити, которыхъ кольве будеть потреба, безъ всякое мѣстское выловы.
А што се тежъ ткнеть плотниковъ, его милость господаръ мѣщаномъ того не поступилъ и въ прывильяхъ своихъ имъ не выписалъ, мають они таки къ замку служити и городового присуда вживати, водлугъ давного обычая; и тежъ што се дотычеть кап- щизны зъ мѣста Кіевского, мають они давати съ кождое корчмы на кождый годъ по двѣ копѣ грошей въ монетѣ Литовской; а которому коли слузѣ своему роскажемъ капщызну брати, тому они мають давати съ корчмы по чотыры гроши, подлѣ обычая; а до шинкарокъ никоторого дѣла не маеть, нижли мають шинкарки къ ратушу права ихъ Маитборского зъ мѣстомъ вжывати. И тежъ которые кольве мешкають вь мѣстѣ Кіевскомь оные, которые торгомъ се обыходять, и въ безменъ важать, и въ локоть мѣрятъ, и на ряду стоять: тые вси люди и тежъ наши мають къ ратушу мѣста Кіевского они платъ давати и во всѣхъ мѣстскихь платѣхъ помоцни быти, яко ихъ право Маитборское въ собѣ се маеть. И били намъ чоломъ, абыхмо тыхъ всихъ врадовъ къ ратушу имъ поступили. И я, водлѣ привилья и росказанья господара нашого и на нихъ чоломбитье тыхъ всихъ врадовъ вышейписаныхъ, имъ къ ратушѣ поступилъ; въ нихъ они мають справовати и радити, какъ сами налѣпѣй розумѣючи, а мнѣ, воеводѣ и моимъ врадникомъ вже се въ тые врады ни въ которые не вступати. И на то есьмо имъ сесь нашъ листъ дали, подъ нашою печатью.Писанъ у Кіевѣ, генваря 9 день, индиктъ 6.
Акты ЮЗР. - СПб., 1863. - Т. 1. - С. 57-58.