№ 21 1516 р., січня 12. - Підтвердна грамота Сиґізмунда І Києву на маґде бурзьке право[339], надане цьому місту королем Александром; в якій міщанам додаються нові права і пільги 1545 р., квітня 24. — Підтвердження цієї ж грамоти Сиґізмундом Авґустом[340]
Жикгимонтъ Августъ. милостію Божіею король Полскій. великій князь Литовскій. Рускій. Прускій. Жмудскій. Мазовецкій и протчая панъ и дѣдичъ.
Ку вѣчной тоей речи памяти.
всѣмь и кождому зособно. кому о томь ведати надлежатиметъ. иж перед нашимъ величеством привилей найяснѣйшого и премилостивѣйшого родителя нашего, найхвалебнѣйшого господаря, Жикгмун- та, тоеюжь милостію Божіею короля Полского и найвишшого князя Литовского и иннихъ, его величества града Киева войтъ и зъ мещаны закона вѣри римской, кг- рецкой и ормянской, - покладал привилей на волности и цѣлости, в немъ выраженіе, и на уживаніе права Майдебурского, которимъ зуполна повелено имъ ме- щаномъ судитися, обходитися, и справоватися, и проступныхъ карати и вини з нихъ брати; а яко всякая вещь отминѣ и злымъ припадкомъ подлеглая бываетъ, такъ и тотъ привилей нещастливимъ припадкомъ от поганства, татаръ - которіе частокротне в державу и в граници наши нападають - у нихъ, мещанъ, отбито и печать от оного, на воску витеснену и привѣшонную на шнурку едвабномъ, оторвано, що досконале знать было: только подпись руки его королевского величества и подпись руки секретарской цѣлие и ненарушніи зостали. Що мы, достовѣрно видячи, веру няли, которій привилей такся в собѣ мѣеть: Во имя Господне, аминь. Ку вѣчной тоей рѣчи памяти: поневаж все рѣчи, которіе въ часѣ исправляются, купно з часомъ в забвеніе приходять и з памяти людской вибиваются, и наступу- ющимъ вѣкомь невѣдоми биваютъ, аще для вѣка потомной памяти писанни не обрѣтаются, того ради мы, Жикгмунтъ, Божіею милостію король Полскій, великій Князь Литовскій, Рускій, Прускій, Жмудскій, Мазовецкій и инних господарь и дѣдичь, ознаймуемъ всѣмь обще и кождому зособна, нинѣ и потомъ будучимъ, кому о томъ вѣдати надлежить: яко войтъ и мещане наши Кіевскіе перед маестатомъ нашимъ доносили; что наяснѣйшій негдись король Александеръ, продокъ и наймилшій, брать нашъ, желаючи опустилому краю, земли Руской, лучшого поведенія и даби место Киевь ширилося и множилося в люде и во всѣ достатки и приходи, самому мѣсту Киеву, и мещаномъ Киевскимь, з ласки и щодробливости своей королевской, право немецкое, названное Майдебурское, закону и вѣри Римской, Кгрецкой и Арменской, - надалъ и уфундовалъи опредѣлиль, дабы мещане и всѣ жителѣ Кіевскіе, теперь и на потомъ будучіе, и ихъ потомъки и наслѣдники во всѣхь рѣчахь обходилися и справовалися такь, якь полномошная установа и звичай права, именуемого Майдебурское, означаетъ; и на такое наданъе привилѣй его королевского величества, при завѣсистой печати имъ наданній, передъ нами покладали и доносили, что его королевское величество по тому привилею, в самомъ правѣ Майдебурскомь и на нѣкоторія артикула и пункта не соизволялъ и не повелѣлъ потому быти; но они, помянутіе мещане, на сей часъ покорне намъ были челомъ, дабисьмо имъ в томъ милость нашу королевскую явили, имъ, ме- щаномъ, и мѣсту ихъ право преждереченное, подлугъ привилѣя наяснѣйшого пана брата нашего, негдисъ короля Полского Александра, зуполно и нивчомъ ненарушимо содержати повелѣли и утвердили. Мы прето, маючи ласковїй взглядъ на нихъ, мещанъ, яко на пограничи живучихъ и частокротне от непріятелей нашихъ поносящихъ и терпящихъ разореніе и неволю, а хотячи мѣсту нашему, в люде и во всѣ достатки, разширенія и помноженія, - прозбу ихъ ласкове принявши, право театоницкое, названное Майдебурское, мѣсту нашому Киеву и всѣмь его обивателемъ, тепер в немъ зостаючимъ, и на потомъ будучимъ, Римского, Кгрецкого и Армейского исповѣданія, з особливой и щодробливой ласки нашой королевской, надаемъ, позволяемъ, утверждаемъ и змоцняемъ во вѣчніе времена; и тое право Майдебурское зуполне, во всѣхь пунктахъ и артикулахъ содержати позволяемъ и подлога оного установи - обходитися, справоватися и боронитися таковым же способомъ и порядкомъ, якъ мѣсто наше Вѣлно тое право содержитъ и оного уживаетъ, а от правъ Полскихъ, Литовскихъ и Рускихъ и от всѣхь звича- евъ, к тому праву неслушнихъ и противнихъ, предреченнихъ мещанъ виключаемъ и волними чинимъ; такожъ помянутихъ мещанъ от послушенства и власти воеводъ, судей и иннихъ урядниковь нашихъ и ихь намѣстниковь свободними чинимъ: которіе мещане перед ними в якихъ колвекъ рѣчахь и справахъ криминал- нихъ, в великихъ и поточнихъ, то есть - о злодѣйствѣ, о кровопролитей, о убійствѣ, о усѣченіи члонковъ якихъ, о пожогахъ и в иннихъ всихъ проступкахъ, с якой колвекъ причини позванные, - не мѣють отвѣтствовать и не повини ихъ ко отвѣту передъ себя потягати и ни до якихъ винъ и до заплачена онихъ недолжни насиловати; толко они передъ своимъ войтомъ, на тотъ часъ будучимъ, а войтъ з урадо- вими своими передъ маестатомъ нашимь, когда чрез позви наши призвани будутъ о якіе колвекъ справи, тимже власне, а не иншимъ правомъ Майдебурскимъ, на нихъ скаржачимся отвѣтствовати мѣють, опрочже еслиби справа якая приклучи- лася з шляхтичомъ или з иннимъ кимъ, сему праву неподлеглимъ и неподруч- нимъ. Томуж войтовѣ мѣста нашего Киева всѣ справи криминалные, головніе, горловіе, о пожогахъ и инніе всѣ вишеозначенніе даємо моцъ а власть зуполную судити, проступнихъ карати, подлугъ заслуги кождого - мечемъ стинати, топити, огнемъ палити, акъ право Майдебурское во всѣхь своихъ артикулахъ, пунктахъ и параграфахъ описуетъ. Кравцевъ, квовалевъ, цирулниковъ, золотарей, лучниковъ, стрелниковъ, кушнеровъ, шевцовъ и иннихъ всѣхь ремесниковъ, в Києві, теперъ живучихъ и впредь будучихъ, под власт и послушенство мѣскее поддаемъ и при- влащаемъ, а от власти и послушенства воеводъ и иннихъ урадниковъ нашихъ и ихъ намѣсниковь вилучаемъ и уволняемъ: имѣти то хощемъ, жеби отнюдъ ихъ до замку на работизну войсковую не потягано, а жаднихъ бы имъ обидъ и налогь не чинили, опрочъ що з кождого ремесла по два человѣка на услугу и на работизну войсковую и замковую опредѣляемь, которіе прислушати маютъ до замку. Позволяемъ теж помянутимъ мещаномъ вшелякій складъ в мѣстѣ ихъ имѣти; пивомь, медомъ, виномъ и горѣлкою шинковати и с того приходи на потреби мѣскіе обо- рочати; также помѣрное медовое, то есть ведерно, которимъ медъ мѣрится, ятки всѣ резницкіе, полки и лавки, в которихъ живность и всякая мѣлочь продается, воскобойню, где воскъ забивается, зо всѣми приходами до мѣста надаемъ, - тол- кожъ з кождой корчми кождого году по две копи грошей повинна намъ платити; тавожъ тихъ, прежде реченныхъ, мещанъ з некоторого звичаю, в мѣсте Киеъѣ изстари будучого, яки они називають осмныцство, уволняемъ и варуемъ то, абы обывателемъ киевскимъ никто из урадниковъ замку Киевского, а особливѣ названный осмничій за тую установу жадной трудности и турбаціи, хочай бы и при- личилися в таковомъ учинку, не дерзалъ затѣват и от нихъ жаднихъ податей вимо- гати. Гостей також и прихожихъ, подлугъ старого звичаю, заховуемъ; от мита нашего, надлежащего на насъ от рибъ, мещанъ киевскихъ заховуемъ и уволняемъ. Онижъ, мещане, многовротне уже преждемененіи, привилѣй наяснѣйшого короля и великого князя Александра, вишепомененного брата нашого наймильшого, также и нашъ передъ маестатомъ подлинни презентовали и освѣдчали, что его королевское величество и мы по всѣхь панствахъ нашихъ дѣдизнихь, короннихъ и в великомъ князтвѣ Литовскомъ от мытъ и целъ всякихъ сухимъ путемъ и водою мещанъ Киевскихъ уволнили; и позволили купецкимъ людемъ, мещаномъ Киев- скимъ, с товарами и гандлями явими колвекь ити, ихати и судами водою плисти без платежу жодного на цлахъ королевскихъ, князкихъ, панскихъ, духовного и свѣцкого стану; в томъ же привилию виражено, что братъ и продокъ нашъ и мы ихъ, мещанъ киевскихъ, волними учинили от всѣхъ пословъ нашихъ, такожъ московскихъ, молдавскихъ, турецкихъ, перекопскихъ и иннихъ всякихъ посланниковъ, гонцовъ, куриеровъ и от даваня тимъ посламъ подводъ, кормовъ, и питя, и иннихъ видатковъ на привѣть ихъ, и от сторожи скарбовъ и лошадей ихъ, и от походу з посли до орди; такожъ и воеводскимъ посланникомъ лошадей подводы у нихъ имати заказали. И от судовъ всякой власти замковой уволняемъ иноземцевъ и пришелцовъ всякихъ, будучихъ тамъ в Киевѣ и гандлюючихъ купеческимъ про- мисломъ, зо всѣми ихъ послугами, податками и приходами - тимже мещанамъ во владѣніе подаемъ и привращаемъ. Да в томже привилѣи написано, что воєводи Киевскіе, з вымислного нѣкоторого звичаю, по двинадцат грошей бѣрали вини от тихъ мещанъ Киевскихъ, которіе часу лѣтнего в домахъ своихъ огонь держали; яковій поступокъ и звичай мы ганимъ, искореняемъ и ихъ, мещанъ, от такового звичаю уволняемъ; и позволяемъ всѣмъ мещаномъ, купецкимъ и ремеслнимъ лю- демъ, огонь в домахъ своихъ в ночи, албо кождого колвекъ времени, держати и имѣти безь жадной вини и турбаціи от ураду замкового; толко в домахъ шинков- нихъ, в лѣтѣ, когда ночи маліе бывают, при свѣтлѣ пити заказуемъ. И притомъ, всемъ, яко выше помянулося, ихъ мещанъ, многокротне вишепомянутихъ, захо- вуемъ, имѣти то хощемъ непремѣнно. А духовнимъ, то есть: архиепископови закону и вѣри светой римской, метрополиту кгреческому Киевскому и всѣмъ духов- нимъ, в Києві, обикліе свои приходи и подати имѣючимъ, повинни, подлугъ стародавняго звичаю, належите и сполна отдавати, в якіе приходи его королевское величество в то время вступатся не схотѣлъ. Ониж, мещане наши, от ваги - ваго- вое до ратуши повинни давати; заровно теж важницу со всѣми вагами при ратуши заховуемъ, подлугъ давняго звичаю, контрибуціи, то ест - поборъ они, мещане наши, в казну нашу повинни платити заровно, якъ и з иннихъ мѣстъ мещане наши жъ платятъ. Такожъ кождого часу оные мещане наши, заровно з инними мещанами нашими и подданними, подлугъ звичаю давняго, оборону и сторожу отбувати повинни на томъ мѣстцу, где здавна сторожа стоявал и когда килкакротне з нами самими, албо з нашими урадниками, за татарами в погоню потреба бы была; ониж мещане, кождій за себе, подлугъ можности своей збройной конно, якъ до войни надлежать, за указомъ нашимъ албо урадника нашого, безоткладно, без жадной отмовки з инними подданными нашими війздить должни; такожъ въ замку на- шемь, подлугъ обыкновенія давного, ониж, мещане наши, в ночи обходити и окликати повинни. Зверхъ еще, для прибили приходовъ имъ, мещаномъ нашимъ, два ярмарки установляемъ мѣти въ Киевѣ: первій ярмарокъ - о празд- ницѣ Богоявленія Господня, чрез цѣлій тиждень, другій - о праздницѣ Рождества Пресвятія Богородиця, також през цѣлій тиждень. И щоколвекъ мѣсту и мещанамъ нашимъ Киевскимъ, яко вишей вспомянело, надалисмо, змоцнили, от чогож теж и уволнилисмо, - тое накрѣпко, неподвижимо и ни от кого ненарушимо во вѣчніе годы утверждаемъ и заховуемъ, и к сему писанію нашему для свидѣтельетва и увѣренія лутчого, печать нашу королевскую привѣсить повелѣли. Данно в Вилнѣ, в середу передъ праздникомъ близко святого Антонія, року Господня AΦ,SI (1516), при бытности тамъ: в Бозѣ превелебного отца вел- можного Войтеха бѣскупа Виленского; Николая Николаевича Радивила, воєводи Виленского и великого князства вашого Литовского канцлѣра; Юрія Станиславовича Остека, воєводи Троцкого, двору нашого ротмистра; Станислава Яновича, каштеляна Троцкого, а земли Жмутской старости; Юрія Николаевича Радивила, подчашего нашего и старости Кгродинского; Неміра Грималича, старости мелницкого и дрогицкого, маршалка нашего; Юрія Илѣнича, маршалка нашего и старости Берестейского, и при битности нашихъ пановъ радъ и двора- нъ нашихъ, зичливе и вѣрне намъ милихъ, - на чомъ во свидѣтельство подпись руки королевской таковій: Жикгмунтъ король. Подпись руки секретарской - Николай маршалокъ подписалъ. А за тимъ нашиму королевскому и княжескому величеству, именемъ войта, бурмистровъ, райцовъ и всего поспольства мѣста нашего Киева, мещанеж Киевскіе: Тарасъ Алексѣевь, Прокопій Андрѣевичъ, Васко Ходкевичъ, при инстанціи супликовали, абысмо той помянутый приви- лей повагою нашею королевскою и княжескою утвердили; которыхъ прошеніе ласкове принявши, помянутій привилей симъ писаніемъ нашимъ утверждаемъ, укрепляемъ и змоцняемъ: которій привилей, где бы колвекъ въ публичнихъ, го- ловнихъ и в поточныхъ судахъ презентованъ будетъ, абы была вѣра везде, яко самому подлинному была дана. Чего ради сіє писаніе во свѣдительство рукою нашею подписали и печать нашего князства Литовского, на воску притиснувши, привѣсить повелѣли.Дѣялося и дано въ Вилнѣ, въ пятницу, в двадцатъ четвертій день мѣсяца ап- риля, лѣто отъ Рождества Христова AΦMG (1545). При томъ притомніє были: велебній и вельможній Юрій, бискупъ Луцкій; Янъ Глебовичь, воевода Виленскій, державця Бобруйскій и Бориссовскій; Григорій Григоровичь Осчиковичь, Виленскій; Геронимъ, Троцкій каштелянъ; Николай Яновичъ Радивилъ, марша- локъ земскій; Станиславь Довойна, воевода Полоцкій; Иванъ Горностай, марша- локь надворній великого князства Литовского, подскарбій земскій, Слонимскій, Едвенскій, Добшунскій староста, и иншіе пани рада, дворане и урадники наши, верне и вдячне намь миліе. У тото подлинного привилію подпись рукъ таковій:
Жикгимонтъ Августъ, король Полскій.
Валеріянь, Секретеръ его королевского и княжеского величества и писарь княжества Литовского.
С подлинной привилегіи латинского писма на руское переводили: сотникъ Срѣбрянскій, Антонъ Троцина и Михайло Янгелнѣцкій, сотникъ Журавскій.
Грамоты Великих князей Литовских с 1390 по 1569 год /Подред. В. Антоновича и К.
Козловского. - К., 1868. - С. 46-52.
Еще по теме № 21 1516 р., січня 12. - Підтвердна грамота Сиґізмунда І Києву на маґде бурзьке право[339], надане цьому місту королем Александром; в якій міщанам додаються нові права і пільги 1545 р., квітня 24. — Підтвердження цієї ж грамоти Сиґізмундом Авґустом[340]:
-
Давня історія України (до VI ст.) -
Загальна історія України -
Україна 1917-1921 рр -
Україна за радянських часів -
Україна у XVI - XVIII стст. -
Україна у середні віки (VII-XV ст.) -