№ 21 1468, лютого 29. - Судебник короля Казимира Яґайловича, даний Литві[119]

Казимиръ, Божьею милостью король Полскый, великый князь Литовьскый и Рускій, княжа Пруское, и Жомоитьскый и иныхъ, чинимъ знаменито симъ на­шимъ листомъ, кто на нь посмотрить, или чтучи услышить, ижь мы съ князьми и съ паны радою нашею великого князьства Литовьскаго и съ всимъ поспольствомъ согадавши, урядили есмо такъ:

Што съ лицомъ приведуть татя, будеть ли мочи чимъ платити, ино заплати­ти истину; пакъ ли чего у дому не будеть, а будеть ли то жона вѣдала зъ дѣтми ужо изрослыми, ино жоною и дѣтми заплатити, а самого на шибѣниц; а што бу­дуть малый дѣти, ниже семи годовъ, тыи въ томъ невинни.

А въ кого будетъ украдѣно, а што судьи присудять: ино прво заплатити истьцю, а потомъ осподарь татя того вину свою бери.

А коли выдадуть жону, а любо дѣти татиныи, а у колцѣ судьи скажють, а потомъ возмогутъ ли ся выкупити, а любо осподарь ихъ усхочетъ выкупити: и они могуть ся выкупити. А будетъ ли въ дому статковъ татя того, и онъ домовыми статкы плати: оли жъ бы не было чимъ платити изъ дому, ино жоною и дѣтми платити, какъ у верху писано.

А коли бы злодѣй што у кого укралъ, а и гдѣ украдѣно, а тамъ его ухватятъ съ лицомъ, а онъ у домъ не принеслъ, жона и дѣти того не поживали: злодѣй терпи, а жона и дѣти и домъ ихъ невиненъ.

А коли злодѣй изъ дому вышелъ, а украдеть што и потеряеть, а любо што изьѣсть, а кромѣ жоны и дѣтей: ино домовыми статкы, што того татя влостное, заплатити, а жона и дѣти, и статкы женьни отъ того порожни.

А коли чій человѣкъ у злодѣйство упадеть, а будеть осподарь его тое вѣдалъ, а любо и съ нимъ удѣлъ имѣлъ, а будеть на то доводъ: и тотъ такъ терьпи, какъ который злодѣй.

А который будеть лежъни держати у своемъ дому тайно, а сусѣдемъ околици не оповѣдаеть, а въ томъ часу што у кого изгынеть, а будеть на то доводъ, ижь лежьни дрьжалъ: ино дати тому рокъ^[121], и другій, и третій, ижь бы того лежьня поставиль, ли съ себе извелъ; а пакъ ли на рокъ на послѣдній не поставить, запла­ти жъ, а того ищи; а нашодъ къ праву поставити: не дѣй исправляется, а то уже заплачено.

А коли бы нашъ человѣкъ вину далъ князьскому или паньскому, или боярь- скому человѣку, а въ которомъ повѣтѣ, подъ нашимъ намѣстничьствомъ или ти- вуньствомъ: ино нашему намѣстнику, а любо тивуну, обослати, ижьбы нашому человѣку стало ся право; а пакъ ли усхочеть на обчій судъ, ино ихъ на обчій судъ пустить и рокъ дати.

А будуть ли на нашомъ человѣцѣ князьскыи или паньскыи, или боярскыи люди чого искати: ино тому судъ и право передъ нашими намѣстьникы и тиву­ны, который отъ насъ гдѣ што дръжить; а нашимъ урядникомъ дати право на обѣ сторонѣ.

А которому человеку князьскому или паньскому, или боярьскому до князь- скыхъ и до паньскыхъ или до бояръскыхъ людей дѣло: ино хто ищеть на комъ, ѣхати ему искати правомъ предъ осподаремъ его; а не удѣлаеть ли права, ино обчій судъ, рокъ положивъ со обу сторонъ, а тогды удѣлати и справедливость. Пакъ ли будеть нѣкоторый отводити, ино намъ дати дѣцького^[122]; а не пригодить ся насъ въ великомъ князьствѣ Литовьскомъ, ино воеводамъ нашимъ моцно дати дѣцького.

А коли злодѣя выдадуть исъ права, а чимъ его възвелять, казнити по его дѣломъ. А кому татя выдадуть, а тотъ не въсхочеть его казнити, а усхочеть на немъ заплату побрати, а его пустити, а любо его собѣ вь неволю възяти, а на то будеть доводь: тотъ уже исъ права выступаеть, и намъ и съ паны радою нашою великого князьства Литовьского о томъ погадавъ, какъ его казнити, а и сказнити его, чого будеть достоинъ.

А кто украдеть выше полукопья, а любо корову, того узвѣсити.

А который впервое украдеть, а дотоль будеть не крадывалъ: ино за первую татбу виною его казнити; аже будеть ниже полтины домовыи речи кралъ, домо­выми жъ речьми платити; а будеть выше полтины кралъ, хотя бъ пакъ первое укралъ, ино его обѣсити.

А который хотя первое укралъ, а коньская татба, коня укралъ, а съ лицомъ приведуть: того узвѣсити.

А коли татя приведуть, а на кого сокъ усочить, а домучатся татбы^[123], а будеть перво того крадывалъ и кому плачивалъ, а околица то будеть вѣдала: и безъ лица обѣсити.

А пакъ ли сокъ усочить на кого, а лица не будетъ, а перво будетъ укралъ, и околица будетъ перво злодѣйства на него не вѣдала, а будетъ никому не плачи­валъ: ино ему платити татбу истъцю и вину; а смертьною раною его не казнити.

А коли татъ дастъся на муку, а зѣліе знаа, а знатникы будутъ добрыи на него, сокъ усочитъ, а будетъ первѣй того крадывалъ, а любо мучиванъ, а и съвѣдомо то будетъ околици: ино того зѣлейника^[124] хотя не домучатся, ино его обѣсити.

А коли чіи паробъкы^[125] украдутъ што у кого, а пакъ у семъ листу верху писа­но, какъ за которую татбу казнити: коли первое украдетъ, ино его не вѣшати, а заплатити бондою^[126] его; а не будетъ бонды, ино осподаръ его за него заплатитъ, а паробка сказнити и пробити; а коли иметъ часто красти послѣ того, а выше полу- копъя, ино паробка узвѣсити.

А тако жъ кому будетъ до кого какое дѣло, будетъ земное дѣло, ино ѣздокы побрати; а будутъ иныи который дѣла, ино судъи побрати, а искати правомъ; а порубовъ и наѣздовъ не надобѣ, никомуже чинити. А который бы сами собою порубы дѣлали, а любо наѣзды чинили: ино, кому сталася кривда, тотъ и маетъ ся намъ жаловати; а пакъ ли не пригодитъся насъ у великомъ князъствѣ Литовъско- мъ, и онъ имаетъ паномъ радѣ нашей жаловати; и паномъ воеводамъ нашимъ по того послати и велѣти предъ собою моцно поставити, а и досмотрѣти: будетъ ли то такъ чинилъ, а всадити его у казнъ и держати до нашего щастного пріѣханіа: бо тотъ исъ права земъского выступилъ^[127] а надъ право сягнулъ, какъ у верху пи­сано.

А коли бы два мѣли ся правоватъ, а возмутъ собѣ ѣздокы и судъи: ино учи­нити имъ рокъ, а дати вѣдомо за чотыри недѣли, штобы ся оба-два зготовили къ тому року, передъ тыи судъи; судъамъ же и ѣздокомъ тамъ выѣхати на реченое мѣстъцо. А который бы изъ дву тыхъ сутяжаевъ не выѣхалъ, тотъ безъ суда вино­ватъ; а который выѣхалъ, того оправити въ томъ, чого будетъ искати: нижъ коли бы пригодилася наша, а любо земьскаа служба, а любо болѣсть: тымъ того не истратить.

А коли бы кто коня, а любо клячю знашолъ блудящюю, или иныи который речи изнайдеть, ино оповѣдати околици: не изнайдеть ли ся истець до трехъ дневъ, ино повести на королевскый дворъ, по давному, да переемъ^[128] свой возми; а пакъ ли который што утаить, а въсхочеть собѣ покорыстовать, а будеть на то доводъ: тотъ такый злодѣй, какъ который.

А который будеть люди выводити, а любо челядь неволную, а ухватять съ лицомъ: того на шибѣницю, а изнайдеть ли ся сокъ, ино тому право: какъ у семъ листу верху писано, по тому его судити.

А такожъ, гдѣ который мосты мощивали за дядю нашего, за великого князя Витовта, и за великого князя Жикгимонта, тутъ бы й нынѣ каждый свои мостьни- ци замостили и задѣлали, какъ надобѣ; а штобы не мѣшкали, сего жь лѣта удѣлали. А на чіей дѣлници щъкода ся станеть, конь ся образить, ногу изломить: тому пла­тити. А пакъ ли который не задѣлають своихъ дѣлниць сего лѣта, а исплошаться: тотъ исъ права выступилъ, на томъ намъ вины десять рублевъ.

Про тожъ, какъ у семъ нашомъ листу выписано, по тому бы есте рядили, а исъ того не выступали.

Акты ЗР. - СПб., 1846. - Т. 1. - С. 80-83.