№ 14 О науцЬ[753]

Звлаща над все тоє хотячи уважати,

Жебы вас зараз в науку заправовати,

З котрои, яко з жродла, все доброє походить,

И през ню человѣк человѣком ся находить,

Котрую так наддер святьіє поважають,

Же злотым уроженям єи называють.

Той то родзай нѣгды нехай ся зводить,

Але ся завше в народѣ людском находить.

О котруй цный народ русскій занедбаваєт

И за подлѣйшую реч собѣ покладаєт,

За чим всякій неряд и все злоє походить

И до погоршеня цный тот народ приходить,

Же для простоты много ся их уругають

И не наукою очи замыдлявають.

Прето тыж за барзо слушную ся нам рѣч здало,

Абы ся о вас до отцув ваших подало,

Якобы преднѣйшим тым добрым не возгоржали

И в прод всего о науце ся вам старали.

Сконт им же самым от вас з лѣпшим венц бываєт,

Же кождый сын з науки отца поважаєт,

До котрои ся вы охоту тылко, о дѣти, мѣйте

И, що єст вам з пожитком, сами зрозумѣйте.

На Златоустого радѣ полѣгаючи

И єго злотым словом цѣло уфаючи,

Же ведлуг котрих з обох сторон учинивши

И за повинность ся свою дуже уймивши,

Потѣхи с сынов, отцеве, дочекаєте

И онде маєстат Божій оглядаєте,

З цнотливе выховаными сынами ставши

И талантом приробок на лѣчбѣ отдавши.

В радости панской оной абысте зостали

[Зычимо вам] и со святыми опочивали.

⅛5⅛5⅛

Конец с Богом, вся дающем нам благая^[754],

Єму же ничтоже успѣст зависть злая.

И ниже не дающу труд что успѣвает,

Яко и дающу зависть в чем запивает.

Українська література XIV-XVI ст. /Під ред. В. Микитася. - К., 1988. - С. 520-521.