№ 7 1569 р., лютого 1, Люблін. - Грамота Сиґізмунда Августа старості луць­кому, брацлавському і вінницькому, князеві Богушу Федоровичу Борець­кому, яка наказує йому видати селян-утікачів і відшкодувати збитки, за­вдані володимирському підкоморію Олександрові Семашку

Жикгимонтѣ-Августѣ, Божою милостю король Полский, великий князь Ли­товский, Руский, Пруский, Жомоитский, Мазовецкий, Лифлянский и иныхъ. Ста­росте Луцкому, Браславскому и Вѣницкому, князю Богушу Федоровичу Корец­кому.

Жаловалъ намъ подкоморий Володимерский, пань Александро Семашко, о томъ, штожъ дей людей его не мало, отчичовъ именія его Голышевского, зъ жонами зъ дѣтми и зо всими статками и маетностями своими от него втекши, до именья твоего [...] зашли; а ты дей, не толко за напоминаніемь его тыхъ подда- ныхъ его ему не выдаешь и справедливости зъ нихъ не чинишъ, але дей ще тымъ людемъ его, которые за тебе зашли, земли и грунты того именія, Голышевского, черезь границы забирати и в иныхъ поточньхь речахъ многіе кривды, звлаща въ бои и грабежахъ, ему и людемъ его, Голышевскимъ, чиниты кажешъ; вь чомъ онъ кривду и шкоду собе менуючи быти, а тыхъ людей своихъ позыскати хотечи, билъ намъ чоломъ, абыхмо листъ и дворанина нашого о томъ ему, до тебе дати и кгрунтовъ его властныхъ забирати и никоторыхъ кривдъ делати не допустили. А такъ мы придаемъ ему на то дворанина нашого [...], жеби зъ тымъ листом и двораниномъ нашимъ людей своихъ вь именяхъ твоихъ знашолъ; а будуть ли ся знати властными поддаными ихъ - приказуемъ тобе, ажъ бы жесь тыхь людей его зо всѣми статками и маетности ми ихъ, сь чимъ буде до тебе зашли, передь тымъ двораниномъ нашимъ, ничимъ не чикуючи (sic.), выдалъ. A пакъ ли бы ся людьми его быти не знали, ты бы ему зъ ними справедливость не отволочную, водле обычаю права посполитого и статуту земского, при томъ же дворанине на- шомъ вчинилъ, а особливе жебы сесь грунтовъ и землю его властныхъ забирати и никоторыхъ кривдъ людемъ его делати не велелъ, же бы онъ въ томъ собе не шкодовалъ и намъ не жаловалъ.

Писанъ у Люблине, лета Божого нароженя І569 года, месеца февраля 1 дня. (I. S.) Михайло Гарабурда.

Грамоты Великих князей Литовских с 1390 по 1569 год /Под ред. В. Антоновича и К. Козловского. - К., 1868. - С. 148-149.

Еще по теме № 7 1569 р., лютого 1, Люблін. - Грамота Сиґізмунда Августа старості луць­кому, брацлавському і вінницькому, князеві Богушу Федоровичу Борець­кому, яка наказує йому видати селян-утікачів і відшкодувати збитки, за­вдані володимирському підкоморію Олександрові Семашку: