№ 34 1562 р., серпень 5, Вільно. - Привілей Сиґізмунда Авґуста, який звільняє міщан Любеча від сплати торгових мит у всьому Великому князівстві Литовському
Року 1670, февраля 15-го дня.
Пришедши на врядь королевское милости, вь замокъ Луцкій, до мене, Петра Хомека, подстаростего Луцкого, мещане господарские Любечские, на йме - Гришко Гридковичъ, а Митко Мартиновичъ, покладали передо мною на вряде копию зъ листу его королевское милости, подъ печатю его милости пана Павла Ивановича Сопиги, кашталяна Киевскаго, старосты Любечского, съ подписомъ властное руки господарское и тежъ съ подписомъ руки писара его королевское милости, дана Ос- тафья Воловича, на волъность имъ даное, и просили сами отъ себе, именемъ това- ришовь своихъ, всихъ мещанъ Любечскихь, абы была вычитана и вь книги кгрод- ские вписана, которая копия такъ ся въ собе маетъ: «Жикгимонтъ Августъ, Божю милостю король Полский, а великий князь Литовский, Руский, Пруский, Жомо- итъский, Мазовецкий, Инфлянский и иныхъ, княземъ, паномъ, воеводамъ, кашта- ляномъ, старостамъ, державцамъ, кнегинямъ, паниямъ, вдовамъ, бояромъ и дворя- номъ нашимъ, войтомъ, бурмистромъ, радцамъ и всимъ врядникомъ и мытникомъ нашимъ господарскимъ и тежъ князьскимъ, панскимъ и духовнымъ въ великомъ князьстве Литовскомъ, а особливе дворяномъ нашимъ господарскимъ, на вибране поборовъ уставленнимъ: кгды бояре и мещане замку нашого Любецкого, съ которыми колвекъ товары, набираючи занижъ живности на потребу свою, сухимъ путемъ або воденнымъ поедутъ, приказуемъ вамъ, ижъ бы есте отъ тыхъ то-варовъ ихъ и живностей, што на свою потребу до места тамошнего Любечского попровадять, мыта звыклого и побору новоустановленного на мытахъ нашихъ господарскихъ, князьскихь, панскихъ и духовныхъ не брали, и везде доброволне, нигде ничимь не гамуючи, ихь пропускали, конечно абы то инакъ не было. Писань у Вилни лета Божого нароженя тисяча пятьсотъ шестьдесятъ второго, месеца августа пятого дня.
Подпись руки господарское и тежъ подпись писара его королевское милости Ос- тафя Воловича. А такъ я, тую копию зь листу господарского, слово отъ слова, с початку ажъ до конца, до книгь кгродскихъ записати казалъ.Грамоты Великих князей Литовских с 1390 по 1569 год /Под ред. В. Антоновича и К. Козловского. - К., 1868. - С. 92-93.